वीरगन्ज । माओवादी केन्द्रले पार्टीको प्रदेशसंसदीय दललाई हस्तक्षेप गर्दा आइतबार सरकार पुर्नगठन प्रभावित भएको छ ।प्रदेश नं २ का मुख्य मन्त्री लालबाबु राउतले आइतबार माओवादी केन्दलाई समेटेर मन्त्रिपरिषद विस्तारको तयारी गरेका थिए ।माओवादी केन्द्रबाट सांसद भरत साह र जगत यादव दुईवटा मन्त्रालय लिएर सरकारमा सहभागी हुने प्रदेश संसदीय दलले निर्णय गरेको थियो ।
काँग्रेस र माओवादी केन्द्रबाट सरकारमा जाने व्यक्तिहरुको टुंगो लागेपछि मुख्यमन्त्री लालबाबु राउतले आइतबार शपथग्रहण गराउने तयारी गरेका थिए ।केन्द्रबाट माओवादी केन्द्रका शीर्ष नेताले मुख्यमन्त्री राउतलाई फोन गरेर सपथग्रहण कार्यक्रम रोक्न लगाएपछि मन्त्रिपरिषद् पुर्नगठन गर्ने मुख्य मन्त्री राउतको तयारी रोकिएको हो ।
सरकारमा कसलाई पठाउने भन्नेबारे माओवादी केन्द्रभित्र विवाद छ ।माओवादी केन्द्रका नेताले आफ्ना दुई सांसदलाई सरकारमा जानबाट रोक्न मुख्यमन्त्री राउत र जसपाका अध्यक्ष उपेन्द्र यादवलाई समेत फोन गरेका थिए ।माओवादी केन्द्रमा सरकारमा सहभागी हुँदा माओवादी र पूर्वजनमोर्चा समूहवीच मन्त्रालय बाँडफाँड हुनुपर्ने विवाद उठेको छ ।
प्रदेश २ मा माओवादी केन्द्रले दुई मन्त्रालय पाएको छ । नेताहरुवीच प्रचण्डको तर्फबाट एकजना र नारायणकाजी श्रेष्ठको पक्षबाट अर्को एक जनालाई सरकारमा पठाउनुपर्ने अडान छ ।नारायणकाजी श्रेष्ठ समूहले रामकुमार शर्मा र रुवी कर्णमध्ये एकजनालाई मन्त्री बनाउनुपर्ने अडान राखेको छ ।प्रचण्ड समूहले भने आफु निकट भरत साह र जगत यादवलाई मन्त्री बनाउने निर्णय कार्यान्वयनको पक्षमा छ । दुवैतर्फ आ–आफ्नो अडानमा देखिएपछि प्रदेश २ को विवाद केन्द्रमा आएको हो ।
