वीरगन्ज । प्रधानमन्त्री केपी शर्मा ओलीले महिला अधिकारमार्फत समानताको लय समाउने कुरामा नेपाल विश्वमै उदाहरणीय देश भएको बताएका छन् ।तेस्रो राष्ट्रिय महिला अधिकार दिवसका अवसरमा प्रधानमन्त्री निवास बालुवाटारमा आइतबार आयोजित कार्यक्रमलाई सम्बोधन गर्दै प्रधानमन्त्रीले यस्तो विचार राखेका हुन् ।‘राणा कालको अन्धकार अवस्थाबाट निस्किनासाथ २००८ सालको नगरपालिका निर्वाचन मै महिलाले मतदान गर्ने र उम्मेदवार बन्ने अधिकार पाए’ उनले भने ।
नेपालले यसरी चुन्ने र चुनिने अधिकार महिलालाई दिँदा कतिपय विकसित मुलुकहरुमा नै महिलाको मताधिकार कुरा मात्रै पनि बहसमै सिमित रहेको समेत उनले उल्लेख गरे ।विश्वको वामपन्थी आन्दोलनले महिला समानतालाई सुव्यवस्थित र संगठित रुपमा उठाएको चर्चा गर्दै आइएलओ अभिसन्धी तथा संयुक्त राष्ट्रसंघका बडापत्रमा उल्लेखित महिला अधिकारका पक्ष सोही आन्दोलनको देन भएको पनि उनले बताए ।
देशमा राजनीतिक आन्दोलनको विकाससँग सामाजिक न्याय र समानताको आन्दोलनपछि सँगै उठेको पनि प्रधानमन्त्रीले बताए । २०४६ सालको जनआन्दोलनले ल्याएको परिवर्तनको आलोकमा पहिले पाँच प्रतिशत, त्यसपछि २० प्रतिशत हुँदै अहिले ४१ प्रतिशतसम्म महिला निर्वाचित भएको पनि उनले बताए ।सम्बोधनका क्रममा प्रंधानमन्त्रीले वर्तमान सरकार महिलामाथि हुने हरेक हिंसाविरूद्ध दृढता कार्य गरिरहेको र महिलामाथि हुने कुनै पनि हिंसा क्षम्य नहुने समेत बताए ।
अन्धविश्वास, अज्ञानता वा अन्य कुनै कारणबाट महिला हिंसा, बलात्कार, कुटपिट, अपमान, गालीबेइज्जती, कूप्रथा र कूचलनविरूद्धको संघर्षलाई जारी राख्नुपर्ने भनाई उनको थियो ।महिला अपमानलाई बहादुरी ठान्ने प्रवृत्ति अनपढमा मात्र होइन पढेलेखेकैहरुमा समेत देखिनु समाजका लागि हानिकारक रहेको उनले बताए । ‘आफु पढेलेखेको हुँ भन्ने, भात होइन पिज्जा खानेहरुबाट यस्ता काम भइरहेका छन्, उनको भनाई थियो ।
‘हाम्रा आमा दिदी बहिनीहरूलाई बोक्सीको आरोप लगाउने जस्तो भ्रम र अन्धविश्वास छ, जानीजानी, स्वार्थ, अहंकार र पछौटेपन जे भए पनि त्यो अस्वीकार्य मात्र होइन क्षम्यसमेत हुन सक्दैन,’ प्रधानमन्त्रीको भनाइ थियो । सरकारले बलात्कार र एसिड आक्रमणका विरूद्ध कडा कानुन निर्माण गरेर महिला हिंसा विरुद्ध कार्य गरिरहेको पनि उनले उल्लेख गरे ।
महिला हिंसाका कतिपय घटनामा महिलानै संलग्न देखिनु दुखद पक्ष रहेको बताउँदै प्रधानमन्त्रीले आफ्ना कारण अर्को महिलामाथि हिंसा नहोस् भन्ने तर्फ ध्यान दिनुपर्ने समेत बताए । साथै उनले महिलाको अधिकार प्राप्तिको संघर्षलाई पुरुषहरुले समेत सघाउनुपर्ने विचार समेत राखे ।