वीरगन्ज । सरकारले शनिबार अध्यादेश मार्फत आगामी आर्थिक वर्षको बजेट ल्याउने भएको छ ।प्रतिनिधिसभा विघटन भएको अवस्थामा सरकारले अध्यादेश मार्फत पूर्ण आकारको बजेट ल्याउने भएको हो ।
कोभिड–१९ को रोकथाम तथा स्वास्थ्य पूर्वाधार, खोप खरिद, आउँदो कात्तिक २६ र मंसिर ३ का लागि तोकिएको चुनाव खर्च, यस्तै आउँदो वैशाखमा हुने स्थानीय तहको चुनाव, वृद्ध भत्ता वृद्धि तथा राहत एवम् आर्थिक उत्थानका कार्यक्रम बजेटमा समेटिने छन् ।आगामी आर्थिक वर्षको बजेट १६ खर्ब रुपैयाँ बराबरको हुने अनुमान छ ।
बजेटमा अपूरा परियोजनालाई निरन्तरता, रेल तथा जलमार्ग बिस्तारका योजना, नयाँ तथा पुराना सुरुङ्ग मार्गसहितका लागि खर्च बजेटमा प्राथमिकताका साथ राखिने जनाइएको छ ।
प्रधानमन्त्रीको सिफारिसमा राष्ट्रपतिले जेठ ८ गते बिहानै प्रतिनिधिसभा भंग गरि चुनावको घोषणा गरेका बेला विज्ञहरुले मतदाता प्रभावित गर्ने खालको बजेट नल्याउन सरकारको ध्यानाकर्षण गराइसकेका छन् । तर सरकारले भने अध्यादेशबाटै पूर्ण आकारको बजेट ल्याउने भएको हो ।
संविधानमा जेठ १५ मा नयाँ आर्थिक वर्षको बजेट ल्याउनु पर्ने व्यवस्था छ ।
बजेटको दस्तावेज शनिबार बिहान ११ बजेपछि बस्ने मन्त्रीपरिषद बैठकमा पेश हुनेछ । सो बैठकले अध्यादेशका रुपमा बजेट ल्याउन राष्ट्रपतिलाई सिफारिस गर्ने छ । राष्ट्रपतिबाट प्रमाणीकरण भएपछि शनिबार दिउँसो ४ बजे अर्थमन्त्री विष्णु पौडेलले बजेट भाषण गर्ने तयारी रहेको छ ।
