बीरगन्ज । हाँस्य कलाकार आदर्श मिश्राका पिता विनोद मिश्राको निधनको सम्बन्धमा नर्सहरुलाई जोडेर भईरहेको विवादका सम्बन्धमा नेपाल नर्सिंग संघले बीरगन्जले विज्ञप्ति जारी गरेको छ ।नारायणी अस्पतालको डायलासिस विभागमा कार्यरत नर्सहरुप्रति विभिन्न लाञ्छना लगाई सामाजिक सञ्जालदेखि सञ्चारमाध्यमसम्म गरिएको दुष्प्रचारका सम्बन्धमा नर्सिंग संघले शुक्रबार विज्ञप्ती जारी गरेको हो । संघले नारायणी अस्पतालमा कार्यरत नर्सहरुले कुनै आग्रह पुर्वाग्रह नराखी बिरामीहरुको सेड्युलमा चिकित्सकहरुको सल्लाह बमोजिम गर्ने गरेको विज्ञप्तीमा उल्लेख गरेको छ ।

कलाकार आदर्शका पिता विनोद मिश्रको स्वास्थ्य अवस्था गम्भीर भएका कारण सेड्युल मितीभन्दा एक दिन अगावै जेष्ठ १० गते उनको डायलासिस गरिएको संघले जनाएको छ । आर्दशले सार्वजनिक गरेको भिडियोमा चिकित्सकले ४ घण्टा डायलासिस गर्न भन्दा नर्सले साढे ३ घण्टामात्र डायलासिस गरेको उल्लेख गरेका छन् । संघले भने यस आरोपको खण्डन गरेको छ । संघका अनुसार चिकित्सकको सल्लाहमै मिश्रको साढे ३ घण्टा डायलासिस गरिएको हो । बिरामी मिश्रको मृत्युमा डायलासिस विभागका नर्सिंग स्टाफलाई आक्षेप लगाउँदै सामाजिक सञ्जालमा भ्रम छर्ने काम भएको संघको भनाई छ ।

संघले मिश्रको के कारण मृत्यु भएको हो यकिन नै नगरि बनावटी कुराहरुलाई आधार बनाएर एकपक्षिय रुपमा दुष्प्रचार भएको जनाएको छ । नर्सिंग स्टाफहरुलाई आक्षेप लगाएर कर्तव्यबाट विचलित गरि बिरामीको उपचारमा असर पुर्याउने खोज्नेहरुलाई कारवाहीको माग गरेको छ । यसअघि नारायणी अस्पताल र नेशनल मेडिकल कलेजले पनि आफुहरुको कुनै दोष नभएको भन्दै विज्ञप्ती जारी गरिसकेका छन् ।

यता, मिश्रको मृत्युको कारण रोग मात्र नभएको भन्दै छानविनका लागि आवाजहरु उठ्न थालेका छन् । सामाजिक सञ्जालमा लेखिएका पोष्टहरुको मान्ने हो भने मिश्रको अवस्थामा अस्पतालहरुले गरेको लापरवाहीसम्बन्धी छानविन आवश्यक छ । मिश्रको उपचारमा आबद्ध अस्पतालहरुले विज्ञप्ती जारी गरि एर्काप्रति दोषारोपण गर्न खोजेको भन्दै छानविनका लागि युवाहरुले माग गर्न थालेको हुन् ।