वीरगंज । कोरोनाभाइरस संक्रमणबाट निको भएकाहरुको आँखाको ज्योति खोस्ने र मृत्युसमेत गराउन सक्ने कालो ढुसी अर्थात म्युकरमाइकोसिस संक्रमणलाई भारतका ४ राज्यमा महामारी घोषणा गरिएको छ । केन्द्र सरकारले सबै राज्यलाई यस विषयमा अलर्ट जारी गरेको छ । केन्द्र सरकारले सबै राज्यलाई यो संक्रमणलाई महामारी ऐन अन्तर्गत ‘नोटेबल डिजिज’ घोषित गर्न भनेको छ । जसको अर्थ सबै राज्यले अब कालो ढुसीको संक्रमण, मृत्यु, उपचार र औषधिको हिसाब राख्नुपर्नेछ ।
राजस्थान, हरयाणा, तेलंगना र तमिलनाडुले यो संक्रमणलाई महामारी घोषित गरिसकेका छन् । दिल्लीमा पनि यसका संक्रमितको लागि छुट्टै केन्द्र बनाइएका छन् । अन्य राज्यमा पनि यसलाई महामारी घोषित गर्ने विषयमा गृहकार्य सुरु भइसकेको छ । स्वास्थ्य मन्त्रालयका ज्वाइन्ट सेक्रेटरी लव अग्रवालले कालो ढुसीका कारण कोभिड बिरामीको मृत्युको संख्या बढिरहेको बताउँदै यसलाई नयाँ चुनौती बनेको बताएका छन् ।
भारतमा यसको संक्रमण बढेको छ । राजस्थानमा ४ सय जना यसबाट संक्रमित भएका छन् । मध्यप्रदेशको भोपालमा २७ दिनमा यसबाट संक्रमित बिरामी २३९ जना भेटिइसकेका छन् । यीमध्ये १२९ जनाको शल्यक्रिया भइसकेको छ । पूरै मध्यप्रदेशमा ५८५ जना बिरामी भेटिएको बताइएको छ । यहाँ अझै यो संक्रमणलाई महामारी घोषित गरिएको छैन ।
दिल्लीमा कालो ढुसीका बिरामी ३ सयभन्दा धेरै भइसकेका छन् । एम्स अस्पतालमा मात्र ८० जना भर्ना भएका छन् । तीमध्ये ३० जनाको स्थिति गम्भीर भएको बताइएको छ । हरयाणामा १७७ बिरामी भेटिएका छन् । यो संक्रमणलाई सबैभन्दा पहिले हरयाणाले नै महामारी घोषित गरेको हो । छत्तीसगढमा पनि यसका स.क्रमितको संख्या सय पुग्न लागेको छ । यहाँ एम्समा ६९ बिरामी भर्ना भएकोमा १९ जनाको शल्यक्रिया भइसकेको छ । यहाँ यो संक्रमण महामारी घोषित भएको छैन ।
