जनता समाजवादी पार्टी (जसपा)को महन्थ ठाकुर-राजेन्द्र महतो पक्षीय सांसदहरू भक्तपुरको एक रिसोर्टमा भेला भएका छन् ।बहुमतको सरकार गठनका लागि राष्ट्रपति विद्यादेवी भण्डारीले दिएको समय सकिन केही घण्टा बाँकी रहँदा अध्यक्ष महन्थ ठाकुर र वरिष्ठ नेता राजेन्द्र महतोले आफूपक्षीय सांसदहरूलाई रिसोर्टमा भेला गरेका हुन् ।

महतोनिकट जसपा सांसद प्रमोदकुमार साहले वैकल्पिक सरकार निर्माणको पक्षमा नरहेका १९ सांसद एकसाथ रहेको दाबी गरे । ‘हामीसँग १९ जना सांसदहरू हुनुहुन्छ जो वैकल्पिक सरकार निर्माणको पक्षमा हुनुहुन्न,’ साहले भने, ‘१९ जनामध्ये तीनजना सांसदहरू केही विशेष कारणले अहिले यहाँ उपस्थित हुनुभएको छैन, तर उहाँहरूले हस्ताक्षर गरेर तटस्थ बस्ने बताइसक्नुभएको छ ।’

राष्ट्रपति विद्यादेवी भण्डारीले दिएको समय आज राति ९ बजेबाट सकिने भएकाले त्यसयता आफूपक्षीय सांसदहरू यताउता नहुन् भनेर महतो र ठाकुरले रिसोर्टमा लगेर भेला गरेका हुन् ।

यसैबीच यी दुवै नेताले बिहीवार कांग्रेस सभापति शेरबहादुर देउवासँग पनि भेटेका थिए । भेटमा सत्ता सहकार्य गर्दै आफूलाई सहयोग गर्न देउवाले राखेको प्रस्ताव महन्थले अस्वीकार गरेका थिए ।उनले वैकल्पिक सरकार बनाउने हो भने आफूलाई सहयोग गर्न प्रस्ताव गरेका थिए ।