बीरगन्ज | पर्सा प्रहरीले आईतबार करिब साढे ७० किलो गाँजा बरामद गरेको छ भने गाँजा तस्कर पर्साको बहुदरमाईका सोती कलवार भने फरार भएका छन् ।सूचना परिचालन तथा प्रहरी कारबाहीको सिलसिलामा कलवारको बहुदरमाई नगरपालिका वडा नं. ९ विश्रामपुर स्थित घरमा पुग्दा प्रहरीलाई देख्नासाथ कलवार मोटरसाइकल चढेर फरार भएको प्रहरीले जनाएको छ ।

आफ्नै घरबाट लागु औषध गाँजाको कारोबार गर्ने गरेको भन्ने सूचना पाएर खटिएको प्रहरी कलवारको घर खानतलासी गर्दा जम्मा ७० केजी ४८० ग्राम गाँजा बरामद गरेको जनाएको छ । कलवार आफु सुत्ने कोठाको खाटमुनि ८ प्याकेट, ४ वटा बाल्टिनभित्र ८ थान ८ गरी जम्मा १६ वटा पोकाभित्र लुकाइछिपाई राखेको अवस्थामा प्रहरीले गाँजा फेला पारेको जिल्ला प्रहरी कार्यालय पर्साका प्रवक्ता प्रहरी नायव उपरिक्षक ओमप्रकाश खनालले जानकारी दिए ।

सो परिमाणको गाँजा बरामद गरी निज सोती कलवार विरूद्ध लागु औषध गाँजा सम्बन्धी कसूरमा आईतबार नै मुद्दा दर्ता गरी अनुसन्धान अगाडि बढाइएको प्रवक्ता खनाले बताए । साथै, गाँजा तस्कर कलवारको खोजतलाश गर्न व्यापक प्रहरी परिचालन गरिएको उनले बताए ।