वीरगञ्ज । बिहीबार (भोलि)देखि पर्सा जिल्लामा सुरु हुने निषेधाज्ञा अवधिभित्र उपभोक्ता ठग्ने कार्य गरे तत्कालै कारवाही गर्ने वाणिज्य आपूर्ति तथा उपभोक्ता संरक्षण कार्यालय वीरगञ्जले चेतावनी दिएको छ।

कार्यालयका सूचना अधिकारी दिलिप खँग खत्वेले निषेधाज्ञा अवधिभित्र उपभोक्तालाई ठग्ने तथा अनुचित क्रियाकलाप, कृतिम अभाव, वास्तविक मूल्यभन्दा बढी मूल्य लिइ समान बिक्री वितरण गरेमा कानुन बमोजिम तुरुन्त कारबाही हुने बताएका छन्।

जिल्लामा घोषण गरिएको निषेधाज्ञाको एकदिन पहिले बुधबार बजार अनुगमनको क्रममा उनले निषेधाज्ञाको अवधिमा यस्ता क्रियाकलाप नगर्न व्यवसायीहरुलाई आग्रहसमेत गरेका छन्।

साथै बुधबार वीरगञ्जमा गरिएको बजार अनुगमनको क्रममा मूल्य सूची नराख्ने, खरिद बिल नदेखाउने तीन पसललाई नगद जरिवाना गरेको छ।

अनुगमनको क्रममा वीरगञ्ज महानगरपालिका–१२ मा रहेको नमन किराना गल्ला भण्डारले मूल्य सूची नराखेकोले ५० हजार, वडा नम्बर १० घण्टाघरमा रहेको रक्षा भण्डार र वीरगञ्ज–९ को माँ दुर्गा एण्ड पुनम बस्त्रालयले खरिद बिल नदेखाएकोले १०/१० हजार रुपैयाँ जरिवाना गरिएको सूचना अधिकारी खत्वे जानकारी दिए।

कार्यालयका निमित प्रमुख जित बहादुर भण्डारीको नेतृत्वमा जिल्ला प्रशासन कार्यलय, जिल्ला प्रहरी कार्यालय, वीरगञ्ज उद्योग वाणिज्य संघको प्रतिनिधिसहित बजार अनुगमन गरिएको उनले बताए।