वीरगंज। प्रदेश २ मा कोरोना भाइरसबाट संक्रमित हुनेको संख्या दिनहुँ बढ्न थालेको छ ।भारतमा संक्रमण तीव्र गतिमा बढिरहेका बेला सीमासँग जोडिएको प्रदेश २ का ८ वटै जिल्लामा सतर्कता नअपनाइँदा कोरोना संक्रमितको दर फेरि बढ्न थालेको हो ।सामाजिक विकास मन्त्रालयका अनुसार अहिले न्यून संख्यामा पीसीआर परीक्षण गराउनेमा करिब आधाको हाराहारीमा संक्रमित देखिएका छन् । सोमबार मात्र बीरगन्जमा पीसीआर ल्याबमा ६० जनाको स्वाब परीक्षण गर्दा २८ र सिरहामा १२ जनामा ३ जनाको रिपोर्ट पोजेटिभ आएको छ । थपिएका संक्रमितमध्ये धनुषाका १ , महोत्तरीमा २, बाराका ५ र पर्साका २३ जना रहेका छन् ।

त्यसअघि आइतबार जनकपुरको ल्याबमा ९ जनाको पीसीआर परीक्षण गर्दा दुई जनाको रिपोर्ट पोजेटिभ आएको थियो । त्यसैगरी शनिबार प्रदेश २ का विभिन्न जिल्लामा १५ जना नयाँ संक्रमित फेला परेका थिए ।शुक्रबार संक्रमितको संख्या १२ र बिहीबार १५ जना संक्रमित थपिएको स्वास्थ्य निर्देशनालयले जनाएको छ । शनिबार थपिएका १५ जना संक्रमित बारामा ५ र पर्सामा १० जना रहेका छन् ।

कोरोना भाइरसको नयाँ भेरियन्टले कम उमेरका व्यक्ति बढी संक्रमित भइरहेकाले सर्तक रहन चिकित्सकहरूले सुझाएका छन् । जनकपुरका वरिष्ठ चिकित्सक विजयकुमार सिंहका अनुसार थोरै संख्यामा भइरहेको परीक्षणमा धेरै संख्यामा संक्रमित देखिनु शुभ संकेत होइन । अहिले संक्रमित भइरहेकामा कम उमेरका बढी रहेकाले सर्तकता अपनाउनुबाहेकको विकल्प नरहेको उनले बताए ।‘कोरोना परीक्षण जुन गतिमा हुनुपथ्र्यो, त्यो भएकै छैन । जनताले पनि स्वास्थ्य मापदण्ड पालना गरेका छैनन् । सरकारले पनि स्वास्थ्य सुरक्षाका मापदण्ड कडाइका साथ लागू गर्न तदारुकता देखाएको छैन,’ डा. सिंहले भने, ‘स्वास्थ्य सतर्कता नअपानाए भयावह अवस्था निम्तिन सक्छ ।’