काठमाडौँ | संस्कृति, पर्यटन तथा नागरिक उड्ड्यन मन्त्री भानुभक्त ढकालले त्रिभुवन अन्तर्राष्ट्रिय विमानस्थलको सरसफाइलाई विशेष रुपमा ध्यान दिन निर्देशन दिएका छन्।
आइतबार त्रिभुवन अन्तर्राष्ट्रिय विमानस्थलको स्थलगत अनुगमन गर्दै मन्त्री ढकालले विमानस्थलको सरसफाईलाई विशेष ध्यान दिन निर्देशन दिएका हुन्।
विमानस्थलमा अनावश्यक सामाग्रीहरु पनि यत्रतत्र छरिएर रहेको भन्दै चुस्त दुरुस्त व्यवस्थापन गर्नुपर्ने बताए। सरसफाइका लागि विमानस्थलसँग पर्याप्त कर्मचारी रहेको भन्दै उनले कर्मचारीको कामको निगरानी राख्न पनि विमानस्थल व्यवस्थापनलाई निर्देशन दिए।
मन्त्री ढकालले विशिष्ट व्यक्तिहरुको गाडी हवाइजहाजको ढोकैसम्म पुग्ने गरेको भन्दै निश्चित मापदण्ड बनाइ क–कसको गाडी विमानस्थलभित्र जान पाउने निर्क्यौल गर्नुपर्ने आवश्यकता रहेको बताए।
मन्त्री ढकालले हवाइजहाजका लागि प्रयोग हुने इन्धन नेपालमा महँगो भएको भन्दै इन्धनको मूल्य अन्तर्राष्ट्रिय रुपमा समान हुनुपर्ने बताए। उनले विमानस्थलभित्रको धावनमार्गको सम्पूर्ण जग्गा विमानस्थलको नाममा नभएको उल्लेख गर्दै विमानस्थलको नाममा ल्याउने प्रक्रिया थाल्न विमानस्थल प्रशासनलाई निर्देशन दिए।
विमानस्थलभित्र बस्ने ट्याक्सीले महँगो भाडा लिने गरेकाले ट्याक्सीहरुलाई सरकारले अतिरिक्त सेवा दिएर भएपनि मिटरमा हिँडाउनु पर्नेमा पनि मन्त्री ढकालले जोड दिए। ट्याक्सीलाई सिस्टममा हिँडाउनका लागि विमानस्थलभित्रको पार्किङ शुल्क मिनाहा गर्नसम्म सोच्नुपर्ने उनको भनाइ छ।
