एजेन्सी । दक्षिणी प्रशान्त सागरको न्यू क्यालेडोनिया टापुमा शक्तिशाली भूकम्प गएको छ । बुधबार साँझ सो टापुमा ७.७ रेक्टर स्केलको भूकम्प गएको हो । सो टापूमा भूकम्प गएसँगै अष्ट्रेलिया, न्युजिल्याण्ड र फिजीमा सुनामी आउने खतरा रहेको भन्दै सतर्क रहन आह्वान गरिएको छ । सुनामी वार्निङ सेन्टरका अनुसार भूकम्प गएलगत्तै प्रशान्त महासागरमा ३ फिट अग्लो छाल मडारिएको छ ।

यो अष्ट्रेलिया र न्युजिल्याण्ड बीचमा पर्ने निकै सुन्दर समुद्री टापु हो । फ्रान्समा पर्ने यस टापुमा ३ लाख जनसंख्या रहेको छ । यसले न्युजील्यान्ड, फिजी र भानुआटुलाई बढी जोखिममा पार्न सक्ने अन्तर्राष्ट्रिय सञ्चारमाध्यामहरुले जनाएका छन् । यसअघि पनि शक्तिशाली भूकम्पका झड्का गइरहने भएका कारण यो क्षेत्रलाई खतराको सूचीमा राखिएको छ ।

अमेरिकी भूकम्प मापन केन्द्रका अनुसार भूकम्पको केन्द्रबिन्दु क्यालेडोनियाबाट ४१५ किलोमिटर टाढा रहेको समुद्रको १० किलोमिटर गहिराईमा परेको छ । न्युजिल्यान्ड भानुआटु र अन्य प्रशान्त महासागरीय टापुहरु सँधै भूकम्पको शिकार हुने गरेका छन् ।