रौतहट | रौतहटमा गत बिहीबार पौने ७ बजे वृन्दावन गाउँपालिका-९ भुसहास्थित गहुँ खेतमा एक पुरूष मृत भेटिए। खबर पाएपछि प्रहरीको टोलीले राति घटनास्थललाई सुरक्षित राखेको थियो।
शुक्रबार तालिम प्राप्त कुकुरसहितको टोली घटनास्थलमा खटियो। मृतकको पेटको बायाँ कोखदेखि दायाँ छातीको मुनिसम्म कालो डाम देखिएको थियो।
जिल्ला प्रहरी कार्यालयका प्रवक्ता प्रहरी नायब उपरीक्षक (डिएसपी) भरत श्रेष्ठका अनुसार उनको शरीरमा करेन्टले पोलाइ डढेकोजस्तो देखिएको थियो।
प्रहरीले मृतक रौतहट गजुरा नगरपालिका-७ प्रतापपुर पल्टुवा बस्ने २४ वर्षीय रितु महरा भएको पत्ता लगायो।
डिएसपी श्रेष्ठका अनुसार मृतक रितु महरा बुधबार राति ११ बजे चोरी गर्न वृन्दावन नगरपालिका-९ भुसहा पुगेका थिए। सो स्थानका ५५ वर्षीय महम्मद आलमको घरमा रितु चोरी गर्न पुगे।
महम्मद आलमले आफ्नो घरमा चोर पसेको थाहा पाएपछि उनले होहल्ला गरेका थिए। त्यो सुनेर रितु घरबाट भागे।
भाग्नेक्रममा रितुको मफलर उनकै घरमा छुट्यो। महम्मदले सो मफलर फेला पारी आफैंले राखे।
त्यस्तै, महम्मदले रितुलाई लखेट्दै गर्दा लमाहाको नदी तरेर उनी फरार भए।
घर फर्किएर महम्मदले गाउँलेलाई सो मफलर देखाउँदा चोरी गर्न आउने व्यक्ति रितु महरा भएको पत्ता लगाए।
महम्मदले महराकै घरमा गएर पनि उनकी श्रीमती धुवपतिया देवी रामलाई सोध्दा सो मफलर उनैको भएको पुष्टि समेत गराएको डिएसपी श्रेष्ठले बताए।
चोरी गर्न गई असफल भएका रितु महराको भाग्नेक्रममा करेन्ट लागेर मृत्यु भएको पोष्टमार्टम रिपोर्टले देखाएको उनले बताए।
भुसहा बस्ने ६६ वर्षीय मसकुर आलमले जंगली जनावरबाट आफ्नो खेती बचाउन खेत वरिपरि आल्मुनियमको तारमा करेन्ट प्रवाह गरिराखेका थिए।
भाग्नेक्रममा सोही तारमा अल्झिएर करेन्टले लाग्दा महराले ज्यान गुमाएको प्रहरीले जनाएको छ।
घटना लुकाउन खोज्दा पक्राउ परे मसकुर आलम
आलमले बुधबार राति ९ बजे सधैंझैं खेतमा करेन्ट जोडेर घर फर्किएका थिए। भोलिपल्ट दिउँसो ४ बजे खेत जाँदा आफ्नो खेतमा महरालाई मृत फेला पारेका थिए।
लडेको देखेपछि करेन्ट स्विच अफ गरी आलमले आफ्ना भतिज ३८ वर्षीय शेख सजाउँललाई बोलाएर शव घटनास्थल भन्दा एक सय मिटर टाढा लगेर राखेका थिए।
‘त्यसपछि उनीहरू दुबै जना मिलेर आफ्नो खेतमा लगाएको तारबारहरू हटाउन थालेका थिए,’डिएसपी श्रेष्ठले भने।
त्यसक्रममा महम्मद आलमका ३० वर्षीय छोरा शेख माझीले पनि घटनाबारे थाहा पाएपछि सहयोग गरेका थिए।
उनीहरू मिलेर तारबार हटाइ लुकाएको भन्ने आलमले पनि प्रहरीसमक्ष स्वीकारिसकेका छन्। उनलाई प्रहरीले पक्राउ गरी थप अनुसन्धान अघि बढाएको छ।
उनीमाथि थप अनुसन्धान गर्न जिल्ला अदालतबाट सात दिनको अनुमति पनि पाएको छ।
त्यस्तै, प्रहरीका अनुसार मृतक रितु महरा पहिले पनि आपराधिक क्रियाकलापमा पक्राउ परिसकेका व्यक्ति थिए।
उनी २०७४ साल वैशाख १ गते मोबाइल चोरीको मुद्दामा, २०७५ असार १ गते सार्वजनिक अपराधको मुद्दा, फागुन १६ गते चोरी डाँका मुद्दामा र २०७७ साउन ११ गते अभद्र व्यवहारको मुद्दामा पक्राउ परेका थिए।
