वीरगंज | चीनले भारतसँगको सीमाक्षेत्रमा बोर्डर डिफेन्स भिलेज बनाउने रणनीति अपनाएको भारतीय विश्लेषकहरूले बताएका छन् ।
विभिन्न समाचारहरूमा उल्लेख भएअनुसार, चिनियाँ कम्युनिस्ट पार्टीका क्याडरहरू यी गाउँहरूमा तैनाथ गरिएका छन् । उनीहरू शत्रु शक्तिबाट हुने घुसपैठ रोक्न बसेका हुन् ।
चीनको यस रणनीतिको एक महत्त्वपूर्ण हिस्सा भनेको संरचना निर्माण हो ।
सन् २०१९ मा चीन सरकारले तिब्बतको राजधानी ल्हासालाई सिचुआन प्रान्तसँग रेलमार्गममार्फत जोड्नका लागि सुरुङ र पुल बनाएको छ । नयाँ रेल लिंक चीनका लागि रणनीतिक रूपमा महत्त्वपूर्ण छ र भारतसँग नजिक छ ।
सीमामा गाउँ बन्दा भारतको सुरक्षामा गम्भीर खतरा उत्पन्न भएको छ । बोर्डर डिफेन्स भिलेजहरूले सीमाक्षेत्रको जनसंख्यामा उल्लेख्य परिवर्तन ल्याउन सक्छन् ।
सन् २०१७ मा भारतीय र चिनियाँ सैनिकहरू दोक्लममा आमनेसामने थिए । उक्त पठार तिब्बतमा रहेको यादोङ काउन्टीभन्दा नौ किलोमिटर मात्र टाढा छ ।
यसको भूअवस्थितिका कारण यो संवेदनशील क्षेत्र हो र भारतीय सीमाबाट यो नजिक छ ।
‘चीनले यस क्षेत्रमा प्रभाव बढाएमा चिनियाँ सुरक्षाबल चिकेन्स नेक भनिने सिलिगुडी कोरिडोरमा आइपुग्छन् । चिनियाँहरूले यादोङमा बसेर चिकेन्स नेकमा प्रभाव जमाएमा भारतले युद्धको स्थितिमा पूर्वोत्तर राज्यहरूमा पहुँच गुमाउँछ,’ एक स्रोतले जी न्युजलाई बताए ।
चीनका राष्ट्रपति सी चिनफिङले पूरा देशमा शासन चलाउन देशका सीमामा सुशासन आवश्यक रहेको बताएका छन् ।
तिब्बत स्वायत्त क्षेत्रमा चिनियाँ कम्युनिस्ट पार्टीका प्रमुख वु यिङजिएले तिब्बत विशेष सीमावर्ती जातीय क्षेत्र भएको र चीनको राष्ट्रिय सुरक्षाका लागि निकै महत्त्वपूर्ण रहेको बताएका छन् ।
