वीरगञ्ज  । एडिदास र दि नार्थ फेसको नाम राखेर स्थानीय रेडिमेड कपडा बिक्री गर्ने वीरगञ्जको एक रेडिमेड उद्योगलाई रु ३ लाख जरिवाना गरिएको छ । आईतबार पर्साका प्रमुख जिल्ला अधिकारी आस्मान तामाङको नेतृत्वमा गरिएको उधोग अनुगमनको क्रममा वीरगञ्ज महानगरपालिका ६ मा रहेको एसआर रेडिमेड उधोगलाई ३ लाख जरिवाना गरिएको हो । अनुगमनको क्रममा उक्त उधोगले प्रतिष्ठित एडिदास र दि नार्थ फेसको ब्राण्ड लगाई रेडिमेड कपडाहरु बिक्री गरिरहेको पाइएको थियो ।

उपभोक्ता संरक्षण ऐन २०७५ को दफा ३८ (ङ) बमोजिम वस्तु वा सेवाको वास्तविक गुणस्तर, बनावट आदि ढाँटी लुकाई, झुक्याई बिक्री गरिरहेकोले सोही ऐनको दफा ३९ को (ख) बमोजिम तीन लाख जरिवाना गरिएको वाणिज्य, आपूर्ति तथा उपभोक्ता संरक्षण कार्यालय वीरगञ्जका सुचना अधिकारी दिलिप खँग खत्वेले जानकारी दिए ।

जरिवाना बापतको रकम उधोगलाई सात दिनभित्र राष्ट्रिय वाणिज्य बैंकमा जम्मा गर्न निर्देशन पनि दिईएको खँग खत्वेले बताए ।पर्साका प्रमुख जिल्ला अधिकारी तामाङको नेतृत्वमा १३ नम्बर गण हेडक्वार्टरका सशस्त्र प्रहरी उपरिक्षक राजेंद्र खड्का, राष्ट्रिय अनुसन्धानका टीका प्रसाद पोखरेल, वाणिज्य, आपूर्ति तथा उपभोक्ता संरक्षण कार्यालय बीरगन्जका निरीक्षण अधिकृत जित बहादुर भण्डारीको टोलीले उधोग अनुगमन गरेको थियो ।