वीरगञ्ज। सामुदायिक संस्था सानो पाइलाले पर्साकी प्रहरी उपरीक्षक गङ्गा पन्तलाई सम्मान तथा विदाई गरेको छ ।कोरोना कालमा प्रहरी सामुदायिक साझेदारी कार्यक्रम अन्तर्गत सानो पाइलासँग गरिएको सहकार्यका लागि एसपी पन्तलाई सम्मान गरिएको हो । शुक्रबार सानो पाइलाद्धारा सञ्चालित बालगृह ‘सानो घर’ मा एक कार्यक्रमका विच प्रहरी उपरीक्षक पन्तलाई सम्मान गरिएको थियो । कार्यक्रममा संस्थाकी सचिव डा. सुष्मा तिवारीले सानो पाइलासँगको सहकार्यमा कोरोनाकालमा गरिएका कार्यहरुका लागि आभार व्यक्त गरेकी थिइन ।

सम्मान कार्यक्रमलाई सम्बोधन गर्दै प्रहरी उपरीक्षक पन्तले कोरोनाकालमा सानो पाइलाले निर्वाह गरेको भुमिकाको प्रशंसा गरेकी थिइन । प्रहरीसँगको सहकार्यमा सानो पाइलाले समुदायका लागि गरेका कार्यहरु सराहनीय रहेको बताइन ।सो अवसरमा सानो घरका बालबालिकाहरुले प्रहरी उपरिक्षक पन्तलाई सानो घरको अवलोकन समेत गराएका थिए । कार्यक्रममा डा. तिवारीले प्रहरी उपरीक्षक पन्तलाई प्रशंसा पत्र, मायाको चिनो र पुष्पगुच्छासहित सम्मान गरेकी थिइन ।

कार्यक्रममा सानो पाइलका सञ्चालन प्रमुख जया साह, सुरक्षा तथा गतिशिल प्रमुख भाजु पटेल, परियोजना संयोजक सुजिता ताम्रकार लगायत कर्मचारीहरुको उपस्थिती रहेको थियो ।कार्यक्रमको सहजिकरण सञ्चारकर्मी विवेक कर्णले गरेका थिए ।