वीरगंज। शुक्रबारबाट सिनेमा हल खोल्ने तयारीमा यतिबेला हल सञ्चालकहरू जुटिरहेका छन् । जसका लागि उनीहरूले अहिले हलको सरसफाइदेखि रंगरोकन समेत गरेका छन् । कोरोना भाइरसको संक्रमणका कारण गत फागुनको अन्तिम साताबाट नेपालमा सिनेमा हल बन्द भएको थियो । अहिले पनि सरकारको अनुमतिबिना नै उनीहरूले सिनेमाहल खोल्न लागेका हुन् ।

सिनेमा हल बन्द भएको १० महिना बितिसक्दा पनि सरकारले हल खोल्न हुनै सहयोग नगरेपछि आफूहरू हाल खोल्न बाध्य भएको हल सञ्चालकहरूको संस्था नेपाल चलचित्र संघका महासचिव अशोक शर्माले बताएका छन् ।

यसरी, शुक्रबारबाट सिनेमा हल खुल्ने भए पनि हलमा नयाँ फिल्म भने दर्शकले हेर्न पाउने छैनन् । एक वर्षअघि रिलिज भएका फिल्म नै पुन सिनेमा हलमा प्रदर्शन गर्न लागिएको छ । दर्शकहरूलाई अहिले हल खोलिएको जानकारी दिनको लागि पुरानै सिनेमा रिलिज गर्न लागिएको चलचित्र संघका अध्यक्ष मधुसूदनको भनाइ छ ।

गत वर्ष प्रदर्शन हुँदा हुँदै रोकिएको चलचित्र आमा र अर्को चलचित्र सेन्टी भाइरसलाई यतिबेला सिनेमा हलमा रिलिज गर्न लागिएको छ । प्रदर्शनको क्रममा रोकिएका दुई नेपाली फिल्म ‘आमा’ र ‘सेन्टी भाइरस’ शुक्रबारबाट पुनः प्रदर्शन गर्ने तयारी भएको चलचित्र संघका अध्यक्ष मधुसूदन प्रधानले बताएका छन् ।

यसै प्रसंगमा संघका अध्यक्ष प्रधानले भने, ‘अहिलेको अवस्थामा एकातर्फ निर्माताहरूले नयाँ चलचित्र दिएका छैनन् भने अर्कोतर्फ सिनेमा घरमा दर्शकको चाप हुने अवस्था छैन । सोही कारण पनि हामीले हलमा प्रदर्शन भइसकेका नेपाली चलचित्रलाई पुनः प्रदर्शन गर्दै छौं ।’ प्रधानका अनुसार मल्टिप्लेक्स सिनेमा हलमा यी दुई नेपाली फिल्मसँगै हलिउड फिल्म ‘मुलान’ र ‘ब्लडसट’ प्रदर्शन गरिने भएको छ ।

चलचित्र आमालाई गत वर्ष दर्शकले रुचाएका हुन् । दीपेन्द्र के. खनालको निर्देशन रहेको यो चलचित्रमा सुरक्षा पन्त र मिथिला शर्माको मुख्य भूमिका रहेको छ । आफूहरूकाले चलचित्र पुनः प्रदर्शन गर्न लागिएकोमा निर्देशक खनालले खुसी व्यक्त गरेका छन् । यो फिल्म गत वर्ष केही हलमा प्रदर्शन हुँदाहुँदै हल बन्द भएको थियो ।

यता रामबाबु गुरुङको निर्देशन रहेको चलचित्र ‘सेन्टी भाइरस’लाई मा सीताराम कट्टेलले निर्माण गरेका हुन् । सीतारामसँगै यो चलचित्रमा, कुञ्जना घिमिरे, दयाहाङ राई, सन्दीप क्षत्रीसहितको मुख्य भूमिका रहेको छ ।

सरकारले फिल्म क्षेत्रलाई बेवास्था गरेको भन्दै गएको साता नेपाल चलचित्र संघले पुष १० गतेबाट सिनेमा हल खोल्ने स्वघोषणा गरेको थियो । संघको निर्देशनमा हल सञ्चालकहरूले सिनेमा हल खोल्न लागेको हुन् । कोरोना संक्रमणविरुद्ध आफूहरू उच्च सुरक्षा सिनेमा हलमा अपनाउने पनि हल सञ्चालकहरूको कथन छ । हल सञ्चालकले ५० प्रतिशत दर्शक राखेर सिनेमा हल चलाउँदै छन् ।

तथापि, हल सञ्चालनमा सरकारले अनुमति दिएको छैन । सरकारले सिनेमा हल बन्द गर्न बल प्रयोग गरे गिरफ्तारी दिन तयार रहेको संघका महासचिव शर्माले बताएका छन् । बाँकी हल सञ्चालकहरूले पनि आफूहरू गिरफ्तारी दिन तयार रहेको बताएका छन् ।