वीरगन्ज ।जनतालाई युग सुहाउँदो सेवा दिन र प्रविधिमैत्री सरकार सञ्चालन गर्न भन्दै हरेक स्थानीय तहले आफ्नो वेबसाइट बनाएका छन्। आफ्ना गतिविधिलाई पारदर्शी, सेवामूलक र जानकारीमूलक बनाउन सबै सामग्री अपलोड गर्ने लक्ष्यका साथ स्थानीय तहमा सूचना प्रविधि अधिकृतको समेत व्यवस्था गरिएको छ। यद्यपि, अधिकांश स्थानीय तहले आफ्ना वेबसाइट अपडेट गरेको पाइँदैन।

जिल्लाका अधिकांश स्थानीय तहले विभिन्न प्रतिवेदन, विद्युतीय सुशासन र सूचना तथा जानकारीमूलक विवरण उल्लेख गरेका छैनन्। बरु, कतिपय स्थानीय तहले आफ्नो वेबसाइटमा अढाई वर्षअघि निर्वाचित जनप्रतिनिधिको विवरण र बोलपत्र आह्वान गरेका विज्ञापन मात्र राखेका छन्। आफूहरूलाई चाहिने मुख्य विवरण नै लुकाउने गरेको सेवाग्रहीको गुनासो छ।

स्थानीय तहका अनलाइनमा जनतालाई आवश्यक पर्ने जानकारीमूलक सामग्री नराखिएको जनकपुरधाम उपमहानगरपालिकाका १३ का युवा राजन झाले बताए।

उनले भने, ‘वेबसाइटमा विवरण नराख्नु जनतालाई सिधै ठग्नु हो। लाखौँ खर्च गरेर स्थानीय तहले वेबसाइट बनाएका छन् र सरकारले सूचना प्रविधि अधिकृतको समेत व्यवस्था गरेको छ, तैपनि स्थानीय तहको वेबसाइट अपडेट नहुनु दुःखद् हो।’

सामान्य विवरण समेत गाउँपालिकाको वेबसाइटमा नभेटिएको पिपरा गाउँपालिकाका रोशन कामतको गुनासो छ।

स्थानीय तहले वेबसाइट बनाएर पनि विभिन्न विवरण वेबसाइटमा नहाल्नु गैरजिम्मेवारीपन रहेको कामतको भनाइ छ।

‘गाउँगाउँमा इन्टरनेटको पहुँच सहज भएका बेला व्यक्तिगत घटना दर्ता, स्थानीय तहका मासिक, चौमासिक र वार्षिक प्रगति विवरण, खर्च तथा आम्दानीका विवरण अनलाइनमा नियमित अद्यावधिक हुनुपर्नेमा त्यस्तो पाइँदैन,’ उनले भने।

जनकपुरधाम उपमहानगरपालिकाको वेबसाइट खोल्दा निर्वाचित वडाध्यक्ष तथा वडा सदस्यहरूको विवरण देख्न सकिन्छ। वेबपेजमा वडागत प्रोफाइल विवरण, सामाजिक सुरक्षा, मासिक, चौमासिक र वार्षिक प्रगति प्रतिवेदन लगायतका विवरण भने अपडेट नै गरिएको छैन।

यस्तै, वेबसाइटमा विद्युतीय शुसासन सेवा अन्तर्गत घटना दर्ता विवरण आर्थिक वर्ष २०७१/०७२ पछि अपडेट नै गरिएको छैन। यस विषयमा नगरपालिकाका निमित्त प्रमुख प्रशासकीय अधिकृत मेहिलाल यादवले वेबसाइट किन अपडेट नभएको हो भन्ने विषयमा आफूलाई केही जानकारी नरहेको बताउँछन्।

यादवले भने, ‘वेबसाइट अपडेट भयो, भएन, किन भएन त्यस विषयमा मलाई केहि जानकारी छैन। हुन सक्छ शाखाका कर्मचारीहरुले वेबसाइट अपडेट गर्ने कर्मचारीलाई डाटा नदिएर अपडेट नभएको होला।’

यस्तै, धनुषाको उत्तरी भेगमा पर्ने क्षिरेश्वरनाथ नगरपालिकाको हालत पनि उस्तै हो। वेबसाइटमा निर्वाचित वडाध्यक्ष तथा वडा सदस्यहरूको विवरण देख्न सकिन्छ विभिन्न मितिमा निकालिएको सूचनाको विवरणहरु पनि छ तर मासिक, चौमासिक र वार्षिक प्रगति प्रतिवेदनलगायतका विवरण भने अपडेट नै गरिएको छैन।

यस विषयमा नगरपालिकाका सूचना अधिकारी अजय कुमार यादवले भने, ‘वेबसाइट अपडेट हुनु पर्ने हो तर अपडेट गर्ने कर्मचारीले नगरेको कारणले अपडेट नभएको हुन सक्छ। यस विषयमा बुझ्छु म।’

यता वेबसाइट अपडेट गर्ने कर्मचारी सूचना प्रविधि अधिकृत अमर पजियारले आफूलाई डाटा नआएकै कारणले अपडेट नभएको बताउँछन्।

अधिकांश स्थानीय तहका वेबसाइटहरुमा निर्वाचित वडाध्यक्ष तथा वडा सदस्यहरूको विवरण त उल्लेख गरिएको छ तर जनतासँग प्रत्यक्ष सरोकार राख्ने विषयहरु उल्लेख नै गरिएको पाइँदैन। वेबपेजमा वडागत प्रोफाइल विवरण, सामाजिक सुरक्षा, मासिक, चौमासिक र वार्षिक प्रगति प्रतिवेदन लगायतका विवरण समावेश गर्ने भनिए पनि ती पूर्ण छैनन्। वेबसाइट अपडेट नहुँदा सामान्य सूचना लिनका लागि पनि स्थानीय तहहरुको कार्यालयसम्म पुग्नु पर्ने बाध्यता रहेको छ।