वीरगंज। अघिल्लो वर्ष पुस ४ गते प्रधानमन्त्री कार्यालयको अफिसियल ट्विटर ह्याण्डलबाट एउटा रिट्विट भयो । कहिलेकाहीँ ट्विटर एकाउन्ट ह्याकरहरूको कब्जामा पुगेर अनावश्यक रिट्विट हुन्छ, गरिन्छ । प्रधानमन्त्रीको रिट्वटचाहिँ भारतमा हिँसा भड्किँदै गर्दा विपक्षी पार्टी कांग्रेस आईकी नेतृ सोनिया गान्धीले देशबासीलाई संयमित हुन गरेको आग्रहमा केन्द्रित थियो ।
त्यही दिन प्रेस सल्लाहकार सूर्य थापाले प्रधानमन्त्री कार्यालयको ट्विटरको पासवर्ड दुरुपयोग भएको ट्विटमार्फतै जानकारी दिएका थिए ।
“सम्माननीय प्रधानमन्त्रीज्यूको ट्विटरबाट अन्यथा रिट्विट भएको देखिन आएको छ । पासवर्डको दुरुपयोग गरी यस्तो गरिएको हुन सक्ने आशङ्कामा छानबीन भइरहेको छ । तसर्थ कुनै प्रकारको भ्रम र गलफतीमा नपर्न अनुरोध गर्छु,” थापाले भनेका थिए ।
तर, प्रधानमन्त्री कार्यालयको ट्विटरको पासवर्ड दुरुपयोग गर्ने कार्य कोबाट हुन गयो भनेर अहिलेसम्म सार्वजनिक हुन सकेको छैन । र, यो प्रकरण यत्तिकै सेलाएर गएको छ ।
अहिले राष्ट्रपति कार्यालयको ट्विटर ह्याण्डलबाट पनि असान्दर्भिक र संस्थागत मर्यादाविपरीतको रिट्विट भएको छ । रिट्वटमा राष्ट्रपति कार्यालयविरुद्ध अनावश्यक टिकाटिप्पणी गर्न नहुने आशय थियो ।
सार्वजनिक रुपमा टिप्पणी हुन थालेपछि राष्ट्रपति कार्यालयले प्रयोगमा ल्याएको @ShitalNiwas नामक ट्विटर ह्याण्डल निश्क्रिय तुल्याएको छ । शीतल निवासले पनि प्रधानमन्त्री कार्यालयले जस्तै साइबर हमला भएको निचोड सुनाउँदै ट्विर ह्याण्डल केही दिनका लागि बन्द भएको जानकारी दिएको छ । राष्ट्रपति कार्यालयका सन्देश, सूचनाहरू सम्प्रेषित गर्न खोलिएको ट्विटर ह्याण्डल दुई दिनपहिले मात्रै भेलिफाइड (नीलो ब्याच पनि भएको थियो । राष्ट्रपति कार्यालयले साइबर आक्रमणको प्रयास भएकाले गलत सन्देश जान सक्ने भन्दै खाता निश्क्रिय बनाइएको जानकारी दिएको छ ।
“अरू इस्यु केही होइन,” राष्ट्रपतिका सञ्चार विज्ञ टीका ढकालले बाह्रखरीसँग भने, “मूल समस्या, ट्विटर एकाउन्ट भेरिफाइ भइसकेपछि धेरै हमला प्रयास हुँदो रहेछ । एक–दुईपटक त रिकभर पनि गरियो । एकाउन्टका कतिपय कुराहरू बचाउनुपर्ने देखियो । सुरक्षा प्रणालीलाई बलियो बनाएर रिकभर गर्ने कि नयाँ खाता सञ्चालमा ल्याउने सल्लाह हुँदैन । रिकभर गर्न मिल्ने गरी त्यहाँ गरिएको ट्विटहरू आर्काइभ गरेको छु । ती ट्विटको प्रिन्ट पनि छ । कति डिजिटल स्वरुपमै पनि राखिएका छन् ।”
राष्ट्रपति कार्यालयका खाता ह्याक भएको नभइ आक्रमण प्रयास मात्रै भएको दोहोर्याए । “अहिलेका लागि खाता निश्क्रिय बनाइएको छ । एकदुई दिनमै यसलाई पूर्ववत् सञ्चालनमा ल्याउँछौं,” उनले भने, “राष्ट्रपति कार्यालयले कुनै रिट्विट गरेको छैन । त्यसरी गर्न मिल्दैन पनि ।”कतैबाट असावधानीवश रिट्विट गरिएको हुनसक्नेतर्फ उनले सङ्केत गरे । “आक्रमणकारीले गर्यो । अथवा फोटोसपमात्रै पनि हुनसक्छ, जे होस्, त्यो ठूलो कुरा भएन । त्यहाँबाट १४ वटा ट्विट भएका छन् । तिनीहरू सुरक्षित छन्,” उनले भने ।
उनले आक्रमण भएको थाहा पाउनसाथ रिकभरको प्रयास थालिएको र बुधबार बिहान रिकभर गरिएको पनि जानकारी दिए । “बिहानसम्म तीन–चारघण्टा लगाएर रिकभर गरेँ,” उनले भने, “यहाँका सूचना तेस्रो पक्षतिर जाने खतरा देखेर मैले सुरक्षित तुल्याएँ ।”राष्ट्पति कार्यालयको ट्विटर खाता निश्क्रिय तुल्याइएपछि सार्वजनिकरूपमा विभिन्न प्रतिक्रिया आएका छन् ।
“राष्ट्रपति व्यक्ति होइन देशको सर्वोच्च संस्था हो । राष्ट्रपति कार्यालय सम्बन्धित जुनसुकै किसिमका हेलचेक्र्याइँले नेकपा कार्यकर्ताको होइन, सारा नेपालीको शिर झुक्छ, जनताको आस्था माथी धावा बोल्न बन्द गरौं । र अर्को कुरा राष्ट्रपति कार्यालयका कर्मचारी र सहयोगीलाई राजनीतिबाट टाढै राखौं,” मानवी पौडेलले ट्विट गरेकी छन् ।
ट्विटरमै मिलन बगालेले राष्ट्रपति कार्यालयलाई कार्यकर्ता भर्ती केन्द्र बनाइएको आरोप लगाएका छन् । “राष्ट्रपति कार्यालयलाई कार्यकर्ता भर्ती केन्द्र नबनाए हुने । असल, इमान्दार, सक्षम, स्वाभिमानी सल्लाहकार तथा चुस्तरदुरुस्त कर्मचारीको टिम बनाए पो । विलासी चालचलन सबै सिक्ने । ज्ञान, विज्ञान, विवेकचाहि नसिक्ने ? राष्ट्रपति संस्थालाई नागरिकले प्रश्नै गर्न नपर्नेगरी सम्मानित बनाउनु है,” उनले सुझाएका छन् ।
त्यस्तै राजेश नामको ट्विटर प्रयोगकर्ताले खाता निश्क्रिय गराएर राष्ट्रपति कार्यालयको मानमर्दन गरिएको बताएका छन् । “तपाईंले तपाईंको वरिपरी कस्तो सल्लाहकार राख्नु हुन्छ त्यसै बाट पनि तपाईंको मूल्याङ्कन गर्न सकिन्छ नि कि कसो हो ? नपत्याए आज शीतल निवास नामक राष्ट्रपति कार्यालयको आधिकारिक ह्यान्डलको हरिबिजोक हेर्नुस् त ! राष्ट्रपती कार्यालयको यो भन्दा बेइजत के हुन सक्ला ? राम राम !”
