दाङ । दाङ आइतबार थप ४७ जनामा कोरोना संक्रमण पुष्टि भएको छ । राप्ति स्वास्थ्य विज्ञान प्रतिष्ठान घोराहीमा गरिएको परीक्षणमा आइतबार दाङका ४७ जनामा संक्रमण देखिएको हो ।

आइतबार संक्रमण देखिनेहरुमा घोराही, तुलसीपुर, लमही, शान्तिनगर, राप्ति र बंग्लाचुली गाँउपालिकाका नागरिक रहेका छन् । आइतबार संक्रमण देखिनेहरुमा ३६ जना पुरुष र ११ जना महिला रहेका छन् । आज दाङमा सबैभन्दा धेरै घोराहीका २१ जना रहेका छन् ।

जसमा १७ पुरुष र ४ महिला रहेका छन् । यस्तै तुलसीपुरमा १३ जना पुरुष र ४ जना महिला गरी १७ जनामा संक्रमण देखिएको स्वास्थ्य कार्यालय दाङले जनाएको छ । यस्तै लमहीमा ३ पुरुष र २ महिला गरी ५ जनामा संक्रमण देखिएको छ । शान्तिनगरमा १ जना पुरुष र एक जना महिला गरी थप २ जनामा संक्रमण देखिएको छ ।

यस्तै यसअघि संक्रमण मुक्त घोषणा गरिएको बंग्लाचुली गाउपालिकाका एक जना पुरुषमा पनि संक्रमण देखिएको छ । यसबाहेक १५ जना उपचाररत संक्रमितको स्वाब परीक्षण गर्दा उनीहरुमा पुनः कोरोना संक्रमण पोजेटिभ नै देखिएको छ ।

दाङमा अहिले संक्रिय संक्रमितको संख्या ६०५ रहेको छ । जसमध्ये अधिकांश संक्रमित होम आइसोलेसनमा रहेका छन् । संक्रिय संक्रमितमध्ये लक्षणसहितका १७ जना संक्रमित कोरोना विशेष अस्पताल बेलझुण्डीमा छन् भने ३६ जना लमहीको आइसोलेसनमा बसेको र बाँकी ५५३ जना होम आइसोलेसनमा बसेको स्वास्थ्य कार्यालय दाङले जनाएको छ ।

आइतबार संक्रमण देखिएका ४७ जनासहित दाङमा संक्रमितको कुल संख्या १ हजार ८९१ पुगेको छ । अहिलेसम्म संक्रमणमुक्त हुनेको संख्या दाङमा १ हजार २७९ पुगेको छ ।