वीरगंज। सरकारले भुसको आगोजस्तै फैलिइरहेको कोरोना संक्रमण नियन्त्रणका लागि केही नयाँ रणनीति लिनेबारे निर्णय गर्न गृहकार्य सुरू गरेको छ । नेपालमा कोरोना संक्रमण समुदाय स्तरमै फैलिएको निर्क्यौल गर्न सरकार अहिले अध्ययनमा लागेको छ ।
नजिकिँदो चाडपर्व र सम्भावित चहलपहललाई मध्यनजर गर्दै सरकारले कोरोनाबारे केही नयाँ निर्णयहरू गर्ने भएको हो । संक्रमण रोकथामको लागि नयाँ कदमहरू चाल्न आइतबार बिहानैदेखि मुख्य सचिवको कार्यालयमा सचिवहरू बैठकमा व्यस्त छन् ।
जारी बैठकमा चाडपर्वमा संक्रमण बढ्न नदिन र अनावश्यक आवतजावत नियन्त्रण गर्न आवश्यक रणनीतिबारे छलफल भइरहेको छ । आइतबार नै साँझ बस्ने सीसीएमसीको बैठकमा अनियन्त्रित बन्दै गरेको कोरोना महामारी रोकथामबारे थप निर्णय हुने बैठकमा सहभागी एक सचिवले जानकारी दिए । ‘सीसीएमसीको सिफारिशपछि सोमवार बस्ने क्याबिनेट बैठकले त्यससम्बन्धमा आवश्यक कदम निर्णय लिन सक्छ,’ ती सचिवले भने ।
संक्रमणको जोखिमलाई मध्यनजरराख्दै यो वर्ष आगामी घटस्थापनादेखि नै सरकारी कार्यालय बन्द गर्नेबारे पनि छलफल भइरहेको ती सचिवले जानकारी दिए ।
बैठकले केही समयको लागि नागरिकलाई काठमाडौं भित्रिन र बाहिरिनबाट रोक लगाउनुपर्ने सुझाव अधिकांश सचिवहरूले दिएका छन् । पूरै उपत्यका शिल्ड गर्ने कि जोखिम बढी भएका स्थानमा मात्रै शिल्ड गर्ने भन्नेबारे सचिवहरूको मत बाझिएको छ । सरकारी कार्यालय, सार्वजनिक यातायात र बढी चहलपहल हुने अन्य स्थानहरू बन्द गर्नुपर्नेमा धेरैको एकमत छ ।
