वीरगंज | पछिल्लो समय बजारमा खाना पकाउने एलपी ग्यासको खपत ३० प्रतिशतले घटेको छ । कोरोना भाइरस नियन्त्रण गर्न गरिएको लकडाउन र निषेधाज्ञाको कारण होटेल, रेष्टुरेन्ट तथा पार्टी प्यालेस बन्द हुँदा ग्यास खपत घटेको हो ।लकडाउनयता बजारमा ग्यासको आयातसँगै खपत पनि घट्दै गएको छ । लामो समयदेखि भएको लकडाउन र निषेधाज्ञाले गर्दा होटेल, रेष्टुरेन्ट, पार्टी प्यालेस, कलेज, उद्योग कलकारखाना सबै बन्द हुँदा ग्यास खपत घट्दै गएको व्यवसायीको भनाइ छ ।
नेपाल एलपी ग्यास उद्योग संघका पूर्वअध्यक्ष शिवप्रसाद घिमिरेले मुलुकभर ग्यासको खपत २५ देखि ३० प्रतिशतले घटेको जानकारी दिए । लकडाउन र निषेधाज्ञाको कारणले गर्दा ग्यासको आयातसँगै खपत पनि कम भएको उनको भनाइ छ । “होटेल, रेष्टुरेन्ट पार्टी प्यालेसमा धेरै ग्यास खपत हुने गरेको थियो,” उनले भने, “कोराना भाइरसको कारण लकडाउन र निषेधाज्ञाको कारणले बन्द हुँदा ग्यास खपत पनि कम भएको हो ।” पछिल्लो समय ग्यासको आयात पनि कम भएको निगमले जानकारी दिएको छ ।
नेपाल आयल निगमका अनुसार सामान्य अवस्थामा मासिक ४० देखि ४५ हजार टन ग्यास आयात हुने गरेकोमा अहिले ३५ देखि ३७ हजार टन ग्यासको आयात भएको छ । ग्यासको आयातसँगै ग्यासको खपत समेत घटेको व्यवसायीले बताएका छन । सरकारले चैत ११ गते लकडाउन गरेलगत्तै बजारमा ग्यासको अभाव देखिएको थियो । त्यसबेला व्यवसायीहरूले आधा सिलिण्डर भए पनि उपलब्ध गराएको थियो । त्यति बेला निगमले ग्यासको आयात पर्याप्त गरेपछि अभाव हटाएको थियो । त्यसपछि बजारमा ग्यासको अभाव नभएको व्यवसासीको भनाई छ । ग्यासको खपत घटेपछि उद्योगसँग ग्यास स्टक रहेको छ ।
लामो समयदेखि भएको बन्दाबन्दीका कारण अधिकांश मानिसहरू आफ्ना गृहजिल्ला फर्कने र पूर्ण रूपमा व्यवसाय बन्द भएसँगै बजारमा ग्यासको खपत घटेको छ । उपत्यकामा सवै भन्दा धेरै ग्यासको खपत घटेको घिमिरेको भनाइ छ ।दैनिक एक लाखभन्दा बढी सिलिण्डर खपत हुनेमा अहिले पूरै घटेको उनको भनाइ छ । व्यवसायीका अनुसार अनुसार उपत्यमामा सबैभन्दा धेरै होटल, रेष्टुराँ तथा अन्य व्यवसाय बन्द भएकाले ग्यासकोे खपत घटेको हो । त्यस्तै, लकडाउन र निषेधाज्ञामा आयातको कमी नभएको कारण ग्यासको अभाव नहुने उनको दाबी छ ।
संघका अनुसार उपत्यकामा मात्रै दैनिक ४० हजार ग्यास खपत हुनेमा अहिले २० हजारभन्दा कम खपत व्यवसायीको भनाइ छ । सामान्य अवस्थामा ७० प्रशित औद्यौगिक प्रयोजन र ३० प्रतिशत ग्यास घरायसी प्रयोजनका लागि खपत हुने गरेको छ । लकडाउनअघि अधिकांश मानिस गाउँमा गएकाले पनि बजारमा ग्यासको खपत घटेको छ । चैत ११ गतेदेखि होटेल रेष्टुरेन्ट, पार्टी प्यालेस पूर्ण रूपमा बन्द छन् । जसको कारणले गर्दा पनि ग्यासको खपत हवात्तै घटेको व्यवसायीको भनाई छ ।
हाल उद्योगसँग १५ हजार टन ग्यास स्टोर रहेको संघले जनाएको छ । नेपालभर ५८ वटा उद्योग छन् । ती उद्योगहरूले एक सय टनदेखि एक हजार टनसम्म क्षमता रहेको उनको भनाइ छ । निजी उद्योगसँग ६ हजार टन ग्यास भन्डारण गर्ने क्षमता रहेको छ । ग्यासको बजार मूल्य एक हजार ३ सय ७५ रुपैयाँ रहेको छ ।
