ललितपुर । ललितपुरमा ट्राफिक प्रहरी जवानमाथि निर्घात कुटपिट गरेको आरोपमा थप ४ जना पक्राउ परेका छन् । कुटपिटमा संलग्न रहेको आरोपमा थप ४ जनालाई आज पक्राउ गरिएको महानगरीय प्रहरी परिसर ललितपुरका प्रमुख एसएसपी टेकप्रसाद राईले जानकारी दिए ।यसअघि बिहीबार ९ जनालाई पक्राउ गरिएको थियो ।
शुक्रबार जिल्ला प्रशासन कार्यालय ललितपुरबाट ७ दिन हिरासतमै राखेर अनुसन्धान गर्न अनुमति लिएको महानगरीय प्रहरी परिसर ललितपुरका एसएसपी राईले बताए ।
‘ट्राफिक प्रहरी जवानमाथि कुटपिट गर्नेलाई ७ दिन हिरासतमै राखेर अनुसन्धान गर्न अनुमति लिएका छौँ’, नेपालकुरासँग एसएसपी राईले भने।उनीहरुमाथि संक्रामक रोग ऐन २०२०, स्थानीय प्रशासन ऐन २०२८ र सार्वजनिक शान्तिविरूद्धको कसुर, अभद्र व्यवहार, कुटपिट, हुलदंग, ज्यान मार्ने उद्योगलगायत मुद्दामा अनुसन्धान थालिएको एसएसपी राईले बताए ।
डिउटीमा रहेका प्रहरीलाई ज्यान लिने गरी आक्रमण भएकाले कानूनी प्रक्रिया अनुसार अघि बढिएको उनको भनाई छ । बिहीबार रातो मच्छिन्द्रनाथको रथ तान्ने क्रममा झडप हुँदा ट्राफिक प्रहरी जवान कमलप्रसाद घिमिरेमाथि कुटपिट भएको थियो ।
यता स्थानीयले भने पक्राउ परेकाहरुले प्रहरीमाथि आक्रमण नगरेको बताएका छन् । भिडमा अन्य बाहिराका व्यक्तिले आक्रमण गरेको भएपनि प्रहरीले निर्दाेष व्यक्तिलाई समातेर दुख दिएको स्थानीयको भनाई छ ।सोही घटनाका कारण शुक्रबार बिहानैदेखि राति १० बजेसम्म ललितपुरको चक्रपथ भित्र कफ्र्यू लगाइएको छ।
