विरगंज । केही दिन यता नेपालमा कोरोनाभाइरसले प्रत्येक दिनजसो नयाँ नयाँ रेकर्ड बनाइरहेको छ । कहिले धेरै जना संक्रमित नेपालमा भेटिएका छन् भने कहिले एकै दिन धेरै जनाको निधन भएको छ । बिहीबार पनि नेपालमा कोरोनाभाइरस संक्रमणले रेकर्ड बनाएको छ । नेपालमा अहिलेसम्म सबैभन्दा धेरै संक्रमित थपिएको दिन हो, बिहीबार । बिहीबार नेपालमा १२२८ जना कोरोनाभाइरस संक्रमित थपिएका छन् ।
स्वास्थ्य मन्त्रालयको तथ्यांकअनुसार बिहीबार नेपालमा १२ जनाले कोभिड १९ का कारण ज्यान गुमाएका छन् । चितवनमा दुई जना, रुपन्देही र सप्तरीमा २–२ जना, भक्तपुर, सिन्धुपाल्चोक, प्युठान, नवलपरासी, कास्की र तनहुँमा बिहीबार एक एक जनाले ज्यान गुमाएका छन् ।
बिहीबार १३ हजार ४ सय १३ नमूना परीक्षण गर्दा १२२८ जना संक्रमित थपिएका हुन् । यीमध्ये ३ सय ९४ जना महिला रहेका छन् भने ८ सय ३४ जना पुरुष रहेका छन् ।
बिहिबार नै काठमाडौं उपत्यकामा अहिलेसम्मका सबैभन्दा धेरै संक्रमित थपिएका छन् । बिहीबार काठमाडौं उपत्यकामा ४ सय ४५ जना कोरोनाभाइरस संक्रमित थपिएका छन् ।
योसँगै नेपालमा संक्रमितको संख्या ४२ हजार ८ सय ७७ पुगेको छ । अनि कोरोनाका कारण मृत्यु हुनेको संख्या चाहिँ २ सय ५७ पुगेको छ ।
