विरगंंज । नेपाल मेडिकल काउन्सिलले लिँदै आएको चिकित्सकको नाम दर्ता (लाइसेन्स) परीक्षा भदौ २० गते सञ्चालन हुने भएको छ।
परीक्षा सञ्चालनका लागि सबै तयारी पूरा भइसकेको भन्दै काउन्सिलले यही २० गते परीक्षा सञ्चालन गर्न लागेको हो। भदौ १४ गतेको मन्त्रिपरिषद् बैठकले परीक्षा सञ्चालनका लागि अनुमति दिएसँगै काउन्सिलले परीक्षा हुने मिति तोकेको हो।
परीक्षा सञ्चालनका लागि काउन्सिलले निश्चित मापदण्ड भने पूरा गर्नुपर्ने हुन्छ। जनस्वास्थ्य तथा सुरक्षाका मापदण्ड पालना गरी परीक्षा सञ्चालन गर्न सकिने अर्थमन्त्री डा युवराज खतिवडाले बताए।
प्रत्येक परीक्षार्थीको चारै तर्फबाट कम्तीमा २÷२ मिटरको दूरी कायम गरी एउटा हलमा २५ जना बढी परीक्षार्थी राख्न नपाउने बैठकले निर्णय गरेको छ। आवश्यक सहजीकरणका लागि आवतजावत र सुरक्षाको व्यवस्था स्थानीय प्रशासनले मिलाउने मन्त्री खतिवडाले जानकारी दिए।
यसअघि काउन्सिलले लिँदै आएको लाइसेन्स परीक्षा लकडाउनका कारण प्रभावित भएको थियो। यही भदौ ७ गतेदेखि लाइसेन्स परीक्षा लिने भनिए पनि अवस्था सामान्य नभएको भन्दै काउन्सिलले उक्त परीक्षा स्थगित गरेको थियो। यसअघि चैत ८ गते तय भएको परीक्षा पनि स्थगित भएको थियो।
काउन्सिलले अवस्था सामान्य भएपछि र सरकारको अनुमतिपछि परीक्षा सञ्चालन गर्ने बताएको थियो।
लाइसेन्स परीक्षा दिन काउन्सिलमै आउन नपर्ने व्यवस्था मिलाएको काउन्सिलका रजिस्ट्रार कृष्णप्रसाद अधिकारीले बताए। काउन्सिलले लाइसेन्स परीक्षाका लागि धरान, विराटनगर, जनकपुर, वीरगञ्ज, चितवन, पोखरा, बुटवल र नेपालगञ्जमै केन्द्र ताकेको छ। लाइसेन्स परीक्षाका लागि चिकित्सकहरु काठमाडौं नै आउनुपर्ने बाध्यता छैन।
उनले भने, ‘हामीले सबै तयारी गरेको भएर नै सरकारसँग परीक्षा सञ्चालनका लागि अनुमति मागेका थियौं।’ जो जहाँ छन्, त्यहीँबाट नै चिकित्सकहरुले लाइसेन्स परीक्षा दिन सक्ने काउन्सिलका रजिस्ट्रार अधिकारीले बताए।
मंगलबार परीक्षा हुने केन्द्रसहित विद्यार्थीको रोल नम्बर सार्वजनिक गर्ने भन्दै उनले भने, ‘सबै विद्यार्थी जो जहाँ छन्, त्यहीँबाट परीक्षा सञ्चालन हुन्छ। हामीले मंगलबार केन्द्र सहित विद्यार्थीको रोल नम्बर सार्वजनिक गर्छाैं। परीक्षाका लागि सबै तयार हुनुहोला।’
उनका अनुसार सबै परीक्षा अनलाइनबाटै हुने भएकाले प्रमाणपत्र लिन मात्र काउन्सिल आउनुपर्ने छ। लाइसेन्स परीक्षाका लागि करिब एक हजार चिकित्सकले फर्म भरेको काउन्सिलले जनाएको छ।
देशभर हाल २७ हजार चिकित्सक काउन्सिलमा दर्ता भएका छन्। काउन्सिलले अन्डर ग्र्याजुएटको वर्षमा चार र पोस्ट ग्र्याजुएटको तीन पटक परीक्षा लिँदै आएको छ।
काउन्सिलले एमबिबिएस पढेर आउने सबै चिकित्सकलाई २०५८ सालपछि लाइसेन्स परीक्षा अनिवार्य गरेको थियो। लाइसेन्स पास गरेकाले मात्र चिकित्सा पेसा गर्न पाउने कानुनी व्यवस्था छ।
