वीरगञ्ज | मकवानपुरको भीमफेदी गाउँपालिका–८, दोभानस्थित माण्डु हाइड्रोपावरको पानी जम्मा गर्ने हेरोस बकेटमा एकजना पुरुषको शव फेला परेको छ।

प्रहरीका अनुसार मंगलबार बिहान उक्त शव बागमती खोलाले बगाएर ल्याएको हो। शवको पहिचान खुलेको छैन।

मंगलबार बिहानै बाजुराको त्रिवेणी नगरपालिका–८, कालापानीस्थित बूढीगंगा नदीको किनारामा पहिचान नखुलेकी अन्दाजी तीन वर्षीया बालिकाको पनि शव फेला परेको छ।

यस्तै पाल्पाको तिनाउ गाउँपालिका–३, झुम्सास्थित सामुदायिक भवनको प्रतीक्षालयमा सोही ठाउँ बस्ने २५ वर्षीय इन्द्रबहादुर लम्तरी र कैलालीको भजनी नगरपालिका–७ चर्राका ३६ वर्षीय अशोक पासीको माछा मार्न लगाएको पासोमा अल्झेर मृत्यु भएको अवस्थामा मंगलबार नै शव फेला परेको छ।

कन्चनपुरको बेलौरी नगरपालिका–४, बजारका ३८ वर्षीय जोगीराम चौधरी घरदेखि करिब पाँच सय मिटर टाढा रहेको खाडलमा जमेको पानीमा मंगलबार मृत फेला परेका छन्