वीरगञ्ज । वीरगञ्जमा कोरोना संक्रमण समुदायस्तरमा फैलिएपछि स्थानीय होटललाई आईसोलेशन बनाएर उपचार गर्न शुरु गरिएको छ । अहिले वीरगञ्जका चार ओटा होटललाई आईसोलेशनको रुपमा प्रयोग गरिएको हो ।

जिल्ला विपद् व्यवस्थापन केन्द्रले होटल र धर्मशालाहरुलाई संक्रमितको उपचारका लागि आईसोलेशनको रुपमा उपोग गर्ने निर्णय गरेको पर्साका सहायक प्रमुख जिल्ला अधिकारी ललितकुमार बस्नेतले जानकारी दिए । वीरगञ्जको होटल रानी पोखरी, गोपाल मण्डली र राणी सती धर्मशालामा आईसोलेशन तयार पारेर उपचारको व्यवस्था मिलाइएको बस्नेतले बताए ।

पर्सामा संक्रमितको संख्या करीब १ हजार पुगेपछि उपचारमा समस्या भएको छ । ‘गण्डक र वीरगञ्ज हेल्थ केयर अस्थायी कोरोना अस्पतालको आईसोलेशनमात्र पर्याप्त भएन ।

संक्रमितलाई होम आइसोलेशनमा छोड्दा अनुशासित नहुने र संक्रमण झन फैलिने सम्भावनाका कारण होटल, धर्मशाला र विद्यालयलगायतका स्थानमा थप २८० बेडको सामुदायिक आईसोलेशन तयार पारिएको छ,’ बस्नेतले भने ।

वीरगञ्जका दुई ओटा अस्थायी कोरोना अस्पतालमा १५० बेडको आईसोलेशन छ । यसअघि नै वीरगञ्जको विजय ज्योति, कुमु प्यालेस र पूजन होटल आईसोलेशनको रुपमा प्रयोगमा आइसकेको होटल तथा पर्यटन व्यवसायी संघका अध्यक्ष हरि पन्तले बताए ।

ती होटलमा स्थानीय केही उद्योग र पालिकाले संक्रमित राखेका छन् । उद्योगका कामदारमा कोरोनाको संक्रमण देखिएमा उद्योग स्वयम्ले आईसोलेशनको व्यवस्था मिलाउनुपर्ने प्रशासनले बताएको छ । बारा–पर्सा औद्योगिक कोरिडोरका करीब आधा दर्जन उद्योगका कामदार कर्मचारीमा कोरोना संक्रमण पुष्टि भइसकेको छ ।

होटलमा आईसोलेशनका संक्रमितलाई तोकिएको मापदण्डअनुसार खाना र आवास उपलब्ध गराउने जिम्मा होटल व्यवसायीको हुनेछ । स्थानीय प्रशासनको समन्वयमा तयार होटल आइसोलेशन सञ्चालनका लागि सरकारले एक दिनको प्रतिव्यक्ति रू.२ हजार उपलब्ध गराउने भएको छ । सामुदायिक अस्पतालमा नारायणी अस्पताल र वीरगञ्ज महानगरको समन्वयमा स्वास्थ्यकर्मी खटाइने भएको छ ।

वीरगञ्जका अन्य होटललाई पनि आवश्यतकताअनुसार आईसोलेशन र क्वारेन्टाइनको रुपमा उपयोग गरिने प्रशासनले बताएको छ । वीरगञ्जको नेशनल मेडिकल कलेजमा ३०० बेडको कोरोना आईसोलेशन बनाउने निर्णय पनि केन्द्रले गरेको छ । यसका लागि केन्द्रीय विपद व्यवस्थापन केन्द्रमा पत्राचार गरिने भएको छ ।

ग्रामीण क्षेत्रका संक्रमितलाई स्थानीय सामुदायिक आईसोलेशनमा राखिने जानकारी बस्नेतले दिए । लक्षण नदेखिएका र सामान्य लक्षणका संक्रमितको यस्ता आईसोलेशनमा र गम्भीर संक्रमितलाई वीरगञ्जमा ल्याएर उपचार गरिने प्रशासनले बताएको छ ।

लक्षणसहितका संक्रमित र मृत्यु हुनेको संख्या बढ्न थालेपछि गत साउन १० गतेदेखि सदरमुकाम वीरगञ्ज र १९ गतेदेखि जिल्लाभरि निषेधाज्ञा जारी गरिएको छ ।  यहाँ अत्यावश्यकीयबाहेकका सबै सेवा, व्यापार, उद्योग सबै बन्द गरिएको छ ।