वीरगञ्ज । कोरोना सङ्क्रमितहरुको उपचारमा उपयोग रेम्डेशिभिर औषधी नेपालमा आधिकारिक रुपमा उपलब्ध नहुँदा विरामीहरुको उपचारमा समस्या उत्पन्न भएको छ ।वीरगञ्जस्थित नारायणी कोभिड अस्पतालको कमाण्ड सम्भालेका वरिष्ठ चिकितिसक डा. नीरज सिंहले रेम्डेशिभिर नेपालको औषधी विभागमा दर्ता नहुँदा अन्य मुलुकबाट गैरकानुन रुपमा आयात गरेर विरामीहरुको उपचारमा प्रयोग गर्नुपरेको बताएका छन् । उनले नेपालको औषधी विभागमा उक्त औषधी दर्ता नहुँदा उत्पादन समेत नहुन सकेको बताएका हुन् ।
डा. सिंहले रेम्डेशिभिर औषधी नेपालमा उपलब्ध नहुँदा कोरोना सङ्क्रमण भएका विरामी र उपचारमा खटेका चिकित्सक र स्वास्थ्यकर्मी समेतलाई समस्या परेको बताउँदै फेसबुकमा एउटा पोष्ट लेखेका छन् ।उनले भारतीय पाँच हजार रुपैयाँ पर्ने औषधी नेपालको औषधी विभागले दर्ता मात्र नभएका कारण गैर कानुन बाटोबाट किन्दा नेपालीहरु ४० हजारदेखि ५० हजारसम्म तिर्न बाध्य भएको उल्लेख गरेका छन् । औषधीलाई नेपालमा दर्ता गरेर आयात गरिए राज्यको लाखौँ रकम बाहिर जानबाट रोकिने उनले तर्क गरेका छन् ।
नेपालमा कोरोना भित्रिएको पाँच महिना बितिसक्दा समेत नेपाल सरकारको यस विषय तर्फ ध्यान नजानु दु:खलाग्दो भएको उनले बताएका छन् । ‘कोरोना माहामारी भित्रीएको झन्डै ५ महिना बितिसक्दा पनि, यस रोगको उपचारमा सबैभन्दा प्रभाबकारी औषधी आइएनजे रेम्डेशिभिर नेपालको औषधी विभारमा दर्ता नहुँदा, उपचार संलग्न चिकित्सकहरूले बिरामीको ज्यान बचाउँन भारतीय मुद्रामा पाँच हजार पर्ने औषधी तस्करहरूबाट नेपाली मुद्रामा ४० हजारदेखि ५० हजार रुपैयाँसम्ममा किनेर गैर कानूनी काम गर्न बाध्य नबनाइ दिनुस्,’ उनले लेखेका छन् ।
डा. सिंहले यास्तो सानो कुराको बारेमा समेत वीरगञ्जबाट लेख्नु पर्ने हो भन्दै सरकारको तयारि माथि प्रश्न गरेका छन् । ‘औषधी विभागमा रजिस्टर गरेर आयात गर्ने हो भने नेपाली मुद्रामा रुपैयाँ ८ हजारसम्ममा आर्थिक रुपमा सक्षम बिरामीहरूले किन्न सक्छन । यस्तो सानो कुरापनि वीरगञ्जबाट मैले भन्नुपर्छ्, ए हजुर यही हो हाम्रो तैयारी? ए हजुर माफी माग्छु, केहि लेख्न र बोल्न मन थिएन्, तर मजबुर, बाध्य भएर सामाजिक सञ्जालमा ओकेलेको हुँ ।’
रेम्डेशिभिर एन्टीभाइरल औषधी हो जुन ईन्जेक्शनका माध्यमले नशामा दिने गरिन्छ । उक्त औषधी विभिन्न मुलुकमा कोभिडका लक्षण देखिएका बिरामी उपर प्रयोग भईरहेको छ । भारत, अमेरिका, सिंगापुर, बेलायत, अस्ट्रेलिया, जापानलगायतका मुलुकहरुमा यस औषधीलाई कोरोना विरुद्धको प्रभावकारी औषधी रुपमा प्रयोग गरिँदैछ ।
हेपाटाईटिसका विरुद्ध बनाइएको यो औषधी हाल विभिन्न भाईरसहरुका विरुद्ध पनि प्रयोग हुँदै आईरहेको छ ।विश्वका विभिन्न मुलुकहरुमा रेम्डेशिभिरलाई मान्यता दिईसक्दापनि नेपालमा अझै मान्यता दिइएको छैन । पछिल्लो समय समुदायमा फैलिएको संक्रमणलाई नियन्त्रण गर्न तीनै तहको सरकार उदासिन देखिएको विज्ञहरुको भनाई छ ।यता विज्ञहरुले नेपालमा रेम्डेशिभिर उत्पादन गर्न नमिल्ने बताएका छन् । उनीहरुले एन्टीभाइरल औषधी नेपालमा उत्पादन गर्ने प्रविधि अहिलेसम्म नभित्रिएकोले हाल आयात गरेर भएपनि कोरोना सङ्क्रमितहरुको उपचारमा उपयोग गर्न सल्लहा दिएका छन् ।औषधी विषयमा जानकार रोजी सर्राफले रेम्डेशिभिर नेपालमै उत्पादन गर्न सके करोडौं बराबरको रकम बाहिर जानबाट जोगिनका साथ थोरै मुल्य मात्र नेपालीहरुले औषधी प्रयोग गर्न मिल्ने बताइन ।yatradaily
