वीरगंज | पुँजी बजारमैत्री मौद्रिक नीति सार्वजनिक भएपछि आइतबार खुलेको सेयर बजारमा उछाल आएको छ । कोरोना र लक डाउनका कारण आहात बनेका लगानीकर्तालाई आइतबारको कारोबारले थप सकारात्मक सन्देश दिएको छ । यस्तै, लामो समयपछि खुलेको सेयर बजारले असारमा पनि केही आशा देखाएकै थियो । तर समग्र आर्थिक क्षेत्र र सेयर बजारका समस्या सम्बोधन हुने गरी मौद्रिक नीति आएपछि आम लगानीकर्ताहरु थप हौसिंदा सेयर बजारमा उछाल आएको हो ।

यसले गर्दा कोरोनाका कारण अधिकांश ब्यापारिक क्षेत्र धर्मराएको समयमा सेयर बजारको पछिल्लो दिनको चमकले केही राहत दिन खोजेको अनुमान पनि गर्न सकिन्छ । आइतबार बजार खुलेको केही समयभित्रै ६% बढेपछि कारोबार बन्द भएको हो । ८ मिनेट २७ सेकेन्ड मात्र कारोबार हुँदा ३ पटक सर्किट बे्रक लागेको थियो । मंगलबार ८४.२६ अंकले बजार बढ्दा १५ वटा कम्पनीमा सर्किट ब्रेकर पनि लागेको छ । जसमा सबैभन्दा धेरै ९ वटा वाणिज्य बैंक मात्र रहेका छन् ।

नेपाल इन्भेष्टमेट बैंकको सर्वसाधारण र संस्थापक दुवै समूहमा १०% ले भाउ बढेर सकारात्मक सर्किट ब्रेक लागेको छ । यस्तै, अन्य कतिपय कम्पनीहरुको पनि राम्रैसँग भाउ बढेको छ । नेप्सेले कम्पनीहरुको भाउ १०% बढेपछि त्यसभन्दा माथि जान नदिन सर्किट ब्रेकर लगाउने गर्छ । यसरी १०% भाउ घट्दा पनि सर्किट लगाउने चलन छ ।