रौतहट । बिहीबार रातिदेखि लगातार भइहेको वर्षाले रौतहटको जनजीवन प्रभावित बनेको छ ।
वर्षाले पूर्वपश्चिम महेन्द्र राजमार्गको चन्द्रपुर क्षेत्र अवरुद्ध बनेको छ । बिहानैदेखि पानीको सतह बढ्दै गएको कारण ठूला सवारीसाधन जेनतेन पास गरेपनि साना सवारीसाधन चल्न नसकेको जिल्ला ट्राफिक प्रमुख प्रहरी निरीक्षक सैलेश न्यौपानेले जानकारी दिए ।
अहिले पूर्व र पश्चि बाट आएको दर्जनौं सवारीसाधन चन्द्रपुर चौक र लचका नजिक अड्केका छन् ।
त्यसैगरी अविरल वर्षाले जिल्लाको पूर्वीभेगमा बागमती र पश्चिममा लालबकैया नदीका साथै साना खोलाहरुमा पनि पानीको सतह बढ्दै गएको छ ।
लालबकैया नदीमा आएको बाढीले कटहरिया ४ र देवाहीघाट नजिक तटबन्धमा कटान गरिरहेको स्थानीय तवारख मियाँले बताएका छन् ।
बकैया र बागमती नदीमा पानीकोस्तर बढ्न थालेपछि स्थानीय प्रशासनले सजग रहन सबैलाई अनुरोध गरेको छ ।
लगातारको वर्षाले गौर,चन्द्रपुर बाहेक १६ वटै स्थानीय तहका सडक प्रभावित हुँदा आवत जावतमा कठिनाइ भैइरहेको छ ।
