वीरगन्ज : वीरगन्ज स्थित नारायणी अस्पतालको पीसीआर ल्याब (प्रयोगशाला) किट अभावमा ३ दिनदेखि ठप्प छ । स्वाब परीक्षणका लागि स्वास्थ्य मन्त्रालयले पठाएको पीसीआर किट काम नलागेका कारण किटको अभाव भइ नारायणीको पीसीआर ल्याब सोमबारदेखि संचालनमा नआएको हो ।
रि–एजेन्ट (पीसीआर किट ) र आरएनए एक्सट्रयाक्सनको अभावमा आइतबार अपरान्हदेखि पीसीआर ल्याब संचालनमा नआएको ल्याब प्रमुख डाक्टर नीरा पाठकले जानकारी दिइन् । पछिल्लो समय स्वास्थ्य मन्त्रालयले पठाएको चिनीया कम्पनी ‘सनस्योर बायोटेक’ को पीसीआर किट अस्पतालको ल्याबमा रहेको पीसीआर मेशीनसँग मेल नखाएकाले ल्याब ठप्प नै भएको उनले बताइन्।
उनका अनुसार , स्वास्थ्य मन्त्रालयले नारायणी अस्पतालको ल्याबको लागि ‘सनस्योर बायोटेक’को ५ सय थान पीसीआर किट पठाएको थियो ।
‘ प्रदेशको मन्त्रालयबाट आएको किट सकिएपछि काठमाडौंको मन्त्रालयबाट आएको किट प्रयोग गर्न खोज्दा मेसिनसँग मेल खाएन’, उनले भनिन्,‘ मन्त्रालयमा जानकारी गराउँदा अहिले होल्ड गर्नु भनेपछि आइतबार अपरान्हदेखि नै ल्याब बन्द छ ।’
प्रदेश सरकारको आग्रहमा संघीय सरकाले नारायणी अस्पतालमा बैशाख ३ मा पठाइ दिएको पीसीआर मेसिन जडान गरी बैशाख २३ देखि पीसीआर ल्याब संचालनमा ल्याइएको थियो । नारायणी अस्पतालको ल्याबमा प्रदेश २ का पर्सा बारासहित ६ जिल्लामा संकलन गरिएका स्वाबको पीसीआर परीक्षण हुँदै आएको थियो ।
अस्पतालका मेडिकल सुपरिटेन्डेन्ट (मेसु) डाक्टर मदन उपाध्यायका अनुसार ल्याब संचालनमा आएदेखि यता आठ वटा कम्पनीका पीसीआर किट स्वास्थ्य मन्त्रालयले पठाएको र ती सबै किट पीसीआर मेसिनसँग मिल्दो भएकाले प्रयोगमा आएको थियो । तर पछिल्लो समय मन्त्रालयले पठाएको ‘सनस्योर बायोटेक’ कम्पनीको पीसीआर किट भने मेशीनसँग मिल्दो नभएकाले स्वाब परीक्षण कार्य रोकिएको उनले बताए ।
अस्पताल श्रोतका अनुसार नेपाली सेनाले खरिद गरी स्वास्थ्य मन्त्रालयलाई उपलब्ध गराएको ‘सनस्योर बायोटेक’ कम्पनीको पीसीआर किट प्रयोगमा आउन नसकेको हो । मन्त्रालयबाट अस्पतालमा पठाइएको किट काम नालागेको विषयमा स्वास्थ्य मन्त्रालय र राष्ट्रिय जनस्वास्थ्य प्रयोगशाला टेकुमा लिखित रुपमै जानकारी गराइसकेको भए पनि त्यहाँबाट कुनै जवाफ नआएको मेसु उपाध्यायले बताए ।
उपाध्यायका अनुसार ‘सनस्योर बायोटेक’कम्पनीको पीसीआर किट वीरगन्जको ल्याबमा मात्र नभइ भरतपुर, हेटौंडा, नेपालगन्ज र काठमाण्डौको राष्ट्रिय जनस्वास्थ्य प्रयोगशालामा समेत प्रयोगमा आउन सकेको छैन । नारायणीको ल्याबमा परीक्षण बन्द हुँदा पर्सासहित विभिन्न जिल्लाबाट संकलन गरी अस्पतालमा ल्याइएका १ हजार ३ सय स्वाब , चेकजाँचका लागि राष्ट्रिय जनस्वास्थ्य प्रयोगशालामा पठाइएको मेसु उपाध्यायले जानकारी दिए । anpurnapost
