जनकपुरधाम । प्रदेश सरकारको अगामी आर्थिक वर्षको नीति तथा कार्यक्रम बहुमतले पारित भएको छ ।
प्रदेशप्रमुख तिलक परियारले प्रदेशसभामा प्रस्तुत गरेका सरकारको नीति तथा कार्यक्रमलाई पारित गरियोस् भन्दै मुख्यमन्त्री लालबाबु राउतले गर्नु भएको प्रस्तावलाई बहुमतले पारित गरिएको हो ।
प्रमुख प्रतिपक्षी नेकपा र नेपाली काँग्रेसले नीति तथा कार्यक्रमको विरोध गर्दै प्रदेशसभा सदस्यहरु दिलिप कुमार साह,शिवचन्द्र चौधरी,गोविन्द बहादुर न्यौपाने,रुबी कुमारी कर्ण,नरेश कुमार यादव,सुन्दर बहादुर विश्वकर्मा र सिता गुरुङ्गलगायतकाले संशोधन प्रस्ताव पेश गरेपनि बहुमतले अस्विकृत भएपछि सभामुख सरोज कुमार यादवले बहुमतबाट नीति तथा कार्यक्रम पारित भएको घोषणा गर्नु भएको हो ।
छलफलमा उठेका प्रश्नहरुको जवाव दिनु हुँदै मुख्यमन्त्री राउतले प्रदेश सरकारको भूमिकालाई प्रभावकारी बनाउँदै स्थानीय साधन स्रोतको अधिकतम उपयोग गर्दै समृद्धि र विकासमा अघि बढने धारणा राख्नु भएको थियो ।
उहाँले छलफलमा उठेका विषयवस्तुहरु सरकारको कामकाजलाई थप प्रभावकारी बनाउने उद्देश्यले आएको हुँदा छुटेका विषयवस्तुलाई आगामी दिनमा समेटेर लैजाने प्रतिबद्धता समेत व्यक्त गर्नु भयो ।
