। लकडाउनको मौका छोपेर तस्करहरुले वन फडानी कार्यलाई तीब्र पारेका छन् । बारा जिल्लाको जितपुर सीमरा उप–महानगरपालिका औराहास्थित प्रगतिशील सामुदायिक वनमा तीब्र रुपमा फडानी भइरहेको हो ।वन तस्करहरुको साथसाथै गाउँलेहरु पनि वन फडानीमा संलग्न रहेका स्थानीय युवाहरुको भनाइ छ ।
तस्करहरुले रातको समयमा हरियो सतिसालको रुख काटेर गोलिया बनाई लैजाने गरेका छन् ।यता, स्थानीयहरु पनि दाउराको नाममा हरियो काचो रुख काटेर घर ल्याउने गरेका छन् । वन संरक्षणका लागि खटेका प्रगतिशील सामुदायिक वन समितिका पदाधिकारीहरुको लापरवाहीको कारण तस्कर तथा स्थानीयहरुले वन फडानी गरिरहेका हुन् ।गत साता आएको हावाहुरीले रुखहरु ढलेको भन्दै हरियो सालको रुख काटेर तस्करी कार्य बढेको हो ।
दिनहुँ रातिको समयमा तस्कर र दिनको सममया स्थानीयहरुले हरियो रुख ल्याउने गरेको स्थानीयहरुको भनाइ छ ।करीब २ सय ५० हेक्टरमा फैलिएको उक्त वनमा सतिसालको रुख संरक्षित रुख हो । वनमा सतिसालको रुखसँगै मसलाको रुख, जामुन, सिरिस, बोर्ड धमेरो लगायतको रुखहरु लगाइएको छ ।तस्करहरुले सतिसालको स–सानो हरियो रुखहरुलाई खोजी खोजी फडानी गर्न थालेका छन् । तस्करहरुले सतिसालको रुखलाई भित्रभित्रै सिध्याई सकेका छन् ।
एउटा सतिसालको रुखलाई हुर्काउनको लागि कम्तिमा ३ देखि ५ वर्षसम्म लाग्ने गरेको छ |सतिसालको काठको माग बढिरहेको र महंगो मूल्यमा विक्री हुने भएकाले तस्करहरु सतिसालको काठतर्फ बढी आकर्षित हुने गरेका छन् । वनमा अहिले दर्जनौं काटिएको रुखको फेदहरु देख्न सकिन्छ ।हरियो र काँचो रुखलाई ढालेर तस्करी गर्ने गरेको कारण भोलिको दिनमा वन विनाश नै हुने भनेर स्थानीयहरु चिन्तित बनेका छन् ।
