वीरगंज संजालअमेरिकी राष्ट्रपति डोनाल्ड ट्रम्पले ट्वीटरसँगको व्यक्तिगत तनावलाई आफ्नो शक्तिसँग जोडेर आक्रामक आदेशमा हस्ताक्षेर गरेका छन् ।ट्वीटरले आफ्ना केही ट्वीटमा तथ्य जाँच राखेपछि ट्रम्प रुष्ट भएका हुन् । उनले सामाजिक सञ्जालले पाउँदै आएका केही कानूनी सुरक्षा हटाउने सम्बन्धी कार्यकारी आदेश जारी गरेका हुन् ।
आफ्नो ट्वीटमा तथ्य जाँच राखेपछि सामाजिक सञ्जाल नै बन्द गर्ने चेतावनी दिएका ट्रम्पले तत्काललाई उनीहरुले पाउँदै आएको केही कानूनी अधिकार कटौती गरेका हुन् ।
ट्रम्पले कार्यकारी आदेश जारी गरेसँग अब नियामक निकायले फेसबुक तथा ट्वीटरसहितका सामाजिक सञ्जालमा पोस्ट भएका सामग्रीप्रति उनीहरुले गर्ने व्यवहारविरुद्ध कानूनी उपचार खोज्न पाउने छन् ।कार्यकारी आदेश जारी गर्ने क्रममा ट्रम्पले सामाजिक सञ्जालसँग हाल बिना नियमन असीमित शक्ति रहेको बताएका थिए ।
ट्रम्पले जारी गरेको आदेशविरुद्ध अदालतमा उजुरी पर्ने सम्भावना छ ।समालोचक तथा कानूनका विज्ञहरुले सामाजिक सञ्जालहरुको सुरक्षाका लागि रहँदै आएको वर्तमान कानूनी व्यवस्था परिवर्तनका लागि अमेरिकी संसद वा अदालती प्रणालीको सहभागिता अनिवार्य रहेको बताएका छन् ।
राष्ट्रपति ट्रम्पले सामाजिक सञ्जालमाथि कन्जरभेटिभ आवाजहरुमाथि बन्देज लगाएको वा सेन्सर गरेको अभियोग लगाउँदै आएका छन् । वाक स्वतन्त्रताको उल्लंघन भएको अभियोग उनको छ ।
मंगलबार साँझ उनको एक ट्वीटमा ट्वीटरले तथ्य जाँच सम्बन्धी नोटिफिकेशन राखेपछि बुधबार ट्रम्पले ट्वीट गरेर ठूलो कदम चाल्ने चेतावनी दिएका थिए । त्यसअघि उनले ट्वीटरले चुनावमा दखल दिन चाहेको आरोप लगाएका थिए ।
ट्रम्पले कम्युनिकेशन डिसेन्सी सम्बन्धी कानूनलाई स्पष्ट पार्नका लागि भन्दै कार्यकारी आदेश जारी गरेका हुन् । सो कानूनले फेसबुक, ट्वीटर, युट्यूबसहितका सामाजिक सञ्जाललाई केही अवस्थामा कानूनी सुरक्षा प्रदान गर्दै आएको छ ।
सो कानूनको धारा २३० अनुसार आफ्ना प्रयोगकर्ताबाट पोस्ट भएका सामग्रीका लागि सामाजिक सञ्जालहरु जिम्मेवार हुँदैनन् । तर सामाजिक हितका लागि ती सामग्रीलाई हटाउने वा चेतावनी राख्नेसहितका काम भर्ने गर्न पाउँछन् ।
ट्रम्पले जारी गरेको कार्यकारी आदेशमा सामाजिक सञ्जालले प्रयोगकर्ताबाट पोस्ट भएका सामग्री सम्पादन गरेमा धारा २३० अन्तर्गतको नियम लागु नहुने उल्लेख छ ।
