ठोरी ।  राजन कुमार बानिया | जेठ ठोरी गाउँ पालिका वडा नं २ र ३ लाई जोड्ने ठुटे खोला पुल निर्माण भएको वर्षौं वितिसक्दा पनि संचालनमा नआएको विषयलाई लिएर ठोरी गाउँ पालिका वडा नं २ को सक्रियतामा वडा नं २ को कार्यालयमा जिल्ला समन्वय समिति पर्साका उप प्रमुख ठाकुर प्रसाद न्यौपाने एवम् गाउँ पालिकाकी उप प्रमुख शान्तिमाया थिङको विशेष उपस्थिति तथा ठोरी गाउँ पालिका वडा नं १,२ र ३ का वडाध्यक्षहरु ,पार्टी प्रतिनिधिहरु , हुलाकी सडकको प्रतिनिधिहरु , इलाका प्रहरी कार्यालय ठोरीका प्रमुख , सशस्त्र सीम प्रहरी का प्रमुख तथा बुद्धिजीवीहरुको बिच अन्तरक्रिया सम्पन्न भएको छ।

आज भएको बैठकमा ठुटेखोला पुर्व रहेको कुलो मध्ये २ ओटा कुलोमा कल्भर्ट निर्माण गरि पुल संचालन ल्याउने सहमती भएको छ । कुलोको विषयलाई लिएर बिगत केही वर्षदेखि काम गर्न समस्या भएको उक्त स्थानमा आजको सर्वपक्षीय बैठकले निकासा निकालेको हो। बैठकले वडा नं ३ का जल उपभोक्ताहरुको सिचाइका लागि व्यवस्थित तरिकाको संरचनाका लागि वडा नं १ ,२ र ३ को जनप्रतिनिधिहरुको समान धारणा बनाइ सम्बन्धित निकायमा प्रस्तुत हुने सहमति सहितको निर्णय भएको हो।

ठुटेखोलामा पुल निर्माण भएता पनि पुल संचालनमा नआएका कारण नागरिकहरुले दु:ख भोग्नु परिरहेकाले यसको निकास निकाल्नको लागि वातावरण निर्माण गर्न वडा नं २ ले समन्वयकारी भुमिका निर्माण गरेको तथा वडा नं १ , २ र ३ का नागरिकहरु वर्षायाममा ठुटेखोला तर्न नसक्दा मृत्युलाई कुर्नुको कुनै उपाय नभएकाले यसको निकास निकाली अबिलम्ब पुल संचालन गर्न सहमति जुटाउनको लागि देश लकडाउनको अवस्थामा रहेको बेलामा पनि बैठकको आयोजना गरिएको वडा नं २ का वडाध्यक्ष किशोर तामाङले बैठकका सहभागीहरुलाई जानकारी गराएका थिए।

गत वर्ष एक महिलालाई सुत्केरी गराउन बिरगंजलाने क्रममा ठुटेखोलामा बाढी आएका कारण मृत्यु भएको घटना स्मरण गर्दै यस्तो घटना फेरि पनि नदोहोरियोस् भनेर अबिलम्म पुल संचालन गर्नु पर्ने धारणा वडाध्यक्ष तामाङले राखेका थिए। जिल्ला समन्वय समिति पर्साका उप प्रमुख ठाकुर प्रसाद न्यौपानेले समस्या पनि ठूलो र समाधान पनि नजिक रहेको धारणा राख्दै ठुटेखोला पुल निर्माण स्थानीय सरोकारको विषय भएकाले निकास पनि स्थानीय स्तरबाटै समाधान गरि पुल संचालन गर्नुपर्ने धारणा राखेका थिए। भारतीयहरुले ठुटेखोलाबाट सिचाइ गरेर लाने गरिएको कारण पनि पुल संचालनमा नआएको बताउँदै हाम्रा भावी पुस्तालाई अफ्ट्यारो नहुने गरि निकास निकासा निकाल्नु पर्ने धारणा समेत उप प्रमुख न्यौपाने राखेका थिए।

सबैले हातोमालो गरेर पुल संचालन गर्नु पर्ने बताउँदै आफुले गर्नुपर्ने पहलमा कुनै कमी हुन नदिने ठोरी गाउँपालिकाकि उप प्रमुख शान्तिमाया थिङले आफ्नो धारणा राखेकी थिइन्। ठोरी १ का वडाध्यक्ष रामप्रकाश कुँवरले ठुटेखोलाको पुल संचालन गर्न ढिलो भएको महसुस गर्दै वर्षायाममा कुनै रोग लागेमा नारायणगढ तथा बिरगंज लान सक्ने अवस्था नरहेकाले पुल संचान गर्न ढिलो भएको बताउँदै यसको निकास निकल्नै पर्ने धारणा राखेका थिए।

वडा नं ३ को वडाध्यक्ष सुर्य बहादुर लामाले नेपाल सरकारको लगानीमा बनेको पुल संचालन नहुनु दु:खद भएको बताउँदै भारतीय पक्षलाई पानी दिदैं गर्दा नेपाली भुमिको रक्षा भने हुनुपर्ने धारणा राखेका थिए। हुलाकी सडकका प्रतिनिधि उद्दव न्यौपानेले स्थानीय सरकारले छिटोभन्दा छिटो यस्को निकास निकाल्दिए आफुहरु काम गर्न आतुर भएको बताउँदै हुलाकी सडकले पाएको समयावधि भित्र काम गर्ने वातावरण नबने उक्त कार्य अपुरो नै छाडेर जानुपर्ने बाध्यतामा ठेकेदार कम्पनीको रहेको बताए।

२०६७ साल जेठ ४ गते अमर एण्ड मृत सन्जिवनी निर्माण सेमा कम्पनीले ६ करोड ९७ लाख २१ हजार रुपैयाँको लागतमा १०२ मिटरको पुल चार वर्ष अगाडी नै निर्माण कार्य सम्पन्न भएको थियो। आजको बैठकमा प्रकाश खनाल ,छतेन्द्र आचार्य , सुदिप थापा ,जगेन्द्र पौडेल , गणेश बहादुर बोहरा ,महेन्द्र तिमल्सिना , ललित बस्नेत हेमराज बम्जन , शम्भु खड्का ,लगाएतका सहभागीहरुले समस्याको र समाधानको बारेमा धारणा राखेका थिए।