वीरगंज संजालवीरगञ्ज : वीरगञ्ज महानगरपालिकाका मेयर विजय कुमार सरावगी पुनः अर्को विवादमा अल्झीदै सामाजिक सञ्जालमा चर्चाका पात्र बनेका छन् ।
नारायणी अस्पतालको आईसोलेशनमा रहेका बिरामीहरुलाई खान दिइएको गुणस्तरहीन खानाको विरोधमा सामाजिक सञ्जालमा लेखिएको एक पोष्टमा मेयर सरावगीको टिप्पणी(कमेन्ट) पछि विवाद सृजना भएको हो ।
आईसोलेशनमा रहेका बिरामीहरुलाई दिइएको खानाको तस्बिर राख्दै एक युवकले मेयर सरावगीको फेसबुक पेजको टाईमलाईनमा ‘मेयर साब यस्तो खाना त तपाईकै घरमा बन्छ होला जस्तो लाग्छ मलाई त, आफुलाई मिठो लागेर नै तपाईले कोभिड १९ का बिरामीलाई खान दिनु भएको हो’ लगायतका अपमानजनक शब्दहरु पोष्ट गरेका थिए ।
यो पोष्टमा नानाथरीका कमेन्ट आउन सुरु भयो ।
देशकै आर्थिक राजधानी तथा प्रदेश २ का एक मात्र महानगरपालिकाको मेयर भएको समेत ख्याल नगरी उक्त पोष्टमा व्यक्तिगत प्रतिष्ठा माथि आँच आउने खालका थुप्रै वाक्यहरु लेखियो ।
मानमर्दन हुने खालका शब्दहरु लेखिएको पोष्ट देखेपछि मेयर सरावगीले पनि आफुलाई थाम्न सकेनन् । र, त्यसपछि यहि पोष्टमा उनले गरेको टिप्पणी (कमेन्ट) हाल सामाजिक सञ्जालमा व्यापक चर्चाको विषय बनेको छ ।
पोष्टको प्रतिवाद गर्दै उनले “बाबु पोष्ट डिलिट गर्नु नत्र ६ महिना बुक हुन सक्छौ किनभने यो खाना नगरपालिकाले सप्लाई गरेको होईन ।” भनेर टिप्पणी (कमेन्ट) लेख्दिए ।
उनको यो कमेन्टमा प्रयोग भएको शब्द बुक हुन सक्छौ हाल सामाजिक सञ्जालमा व्यापक ट्रोल भईरहेको छ । यस क्षेत्रका ट्रोल पेज तथा युवाहरुले उक्त शब्दलाई जोडेर फेसबुकमा थुप्रै व्यंग्य बनाईरहेका छन् ।
उनको कमेन्टको जबाफमा यहाँका केही युवाहरुले जनता र मेयर को पावर हेरौँ समेत भन्न भ्याए ।
मेयर सरावगीले पुनः अर्को कमेन्ट अंग्रेजीमा थपे । उक्त अंग्रेजी कमेन्टको भावानुवाद गर्दा “पहिला अनुसन्धान गर्नुस् अनि लेख्नुस् । पहिला राम्रो मानिस बन्नुस् । धेरै मानिसको सोच गलत दिशामा मोडिएको छ ।”
माथि उल्लेखित सबै क्रियाकलाप मेयर सरावगीको व्यक्तिगत फेसबुक एकाउन्टबाट नभई उनको फेसबुक पेजबाट गरिएको छ । हाल उक्त पोष्ट डिलिट गरिसकिएको छ ।
महामारीका बेला रोकथाम तथा नियन्त्रणका कार्यलाई सशक्त बनाउन बाहेक यस्ता फेसबुके जुहारीमा अल्झीनु जिल्लाका नेतृत्वकर्ताका लागि शोभनिय नभएको यस क्षेत्रका बुद्धिजिवीहरु बताउँछन् । नेतृत्वकर्ताले आफुमाथि लागेका आक्षेपका जबाफ सशक्त कर्म गरेर दिनुपर्छ भन्ने मान्यता छ ।
आईसोलेशनमा दिइएको खानाका बारे एक सञ्चारकर्मी सँग कुराकानी गर्दै महानगरका मेयर सरावगीले आईसोलेशनमा दिइने खानाको जिम्मा नारायणी अस्पतालका मेसु डा. मदन उपाध्यायको भएको बताए । खानाको व्यवस्थापनमा लाग्ने खर्च आफुले मेसु लाई हस्तान्तरण गरिसकेको उनको भनाई छ ।nepalpostdaily
