राजविराज | सप्तरीको शम्भुनाथ नगरपालिका तथा अग्नीसाइर कृष्णसवरण र रुपनी गाउँपालिकाका बासिन्दालाई जङ्गली हात्तीले एक महिनादेखि दैनिक दुःख दिन थालेको छ । मध्यरात भएपछि गाउँ पसेर हात्तीले घर भत्काउन, अन्नबाली खान र मानिसमाथि आक्रमण गर्न थालेपछि त्यस क्षेत्रका बासिन्दाको जीवन कष्टकर बनेको छ ।
कोशी टप्पु वन्य जन्तु आरक्षबाट आएका तीन हात्तीको समूहले शनिबार राति अग्नीसाइर कृष्णासवरन गाउँपालिका–६ मोहनपुरका मोतीलाल बि.क. को घर भत्काएको छ । घर भत्काउनुका साथै हात्तीको समूहले खाद्यान्नसमेत खाइदिएपछि वि.क. लाई हातमुख जोर्न समस्या भएको छ । छोराछोरीसमेत घरमा नभएका वि.क. श्रीमतिको चार वर्षअघि मृत्यु भएपछि एक्लै बस्दै आएका छन् ।
हात्तीको समूहले बिहीबार राति रुपनी गाउँपालिका ६ का दिपककुमार तामाङको घर भत्काइ खाद्यान्न लगायतका सामाग्रीहरू नष्ट गरेपछि तामाङ परिवारको विचल्ली भएको छ । मध्यरात आएको हात्तीले घर भत्काउन थालेपछि भागेर ज्यान जोगाएको बताएकी दिपककी श्रीमति हिरा तामाङले हात्तीले चामल, मकै, पिठो, कोदो खानुका साथै महत्वपूर्ण कागजातसमेत नष्ट गरेको बताइन् । लकडाउनले रोजगारी खोसिएका बेला हात्तीले घर भत्काइ खाधान्नसमेत खाइदिएपछि छाक टार्न समस्या भएको पीडित बताउँछन् ।
रात परेपछि गाउँ पस्ने गरेको हात्तीले घर भत्काउन, भित्र्याइएको गहुँ, धानसमेत खाइदिने गरेको स्थानीय बोधराज सुबेदीले बताए । वडा नम्बर ६ का पुष्पराज बन्जाराले दैनिक रात पर्नासाथ आउने हात्तीले घर भत्काइ मानिसलाईसमेत आक्रमण गर्न थालेपछि गाउँले त्रसित भएको बताए । उनले भने, ’दिनभर नजिकै रहेको टिकघारी र बनमा बस्ने, रात पर्ने बित्तिकै गाउँ छिर्ने हात्तीबाट जोगिन समस्या भएको छ ।’
तीनवटा हात्तीको समूहले १० दिनअघि शम्भुनाथ नगरपालिका–२ भलुवाहीकी ३८ वर्षीया जानुका मगरलाई कुल्चिएर ज्यानै लियो । एक दिनअघि अग्नीसाइर कृष्ण सवरण गाउँपालिका–६ मोहनपुरकै पुष्पराज बञ्जारा र अम्बिका राईको घर भत्कायो । सोही गाउँपालिका वडा नम्बर २ मा हात्तीको समूहले श्यामकुमार राम, लक्ष्मीदेबी राम, बिरेन्द्र राम र नारायण रामको घर तोडफोड गरी खाद्यान्न नष्ट गरेको थियो ।
डिभिजन वन कार्यालय सप्तरीले हात्ती प्रभावित क्षेत्रमा हात्तीबाट जोगिने उपायका बारेमा सचेतनामूलक कार्यक्रमबाहेक नियन्त्रण र रोकथाम गर्न नसकेको जनाएको छ । कार्यालयका प्रमुख सन्तोष झाका अनुसार घुमि हिंड्न थालेका तीन हात्तीले गाउँमा पसेर स्थानीयलाई दैनिक दुःख दिन थालेको बताए । उनले एक महिना यता दैनिकजसो हात्तीले घर भत्काएको, मानिसमाथि आक्रमण गरेको जानकारी कार्यालयमा आइरहेको बताए ।
