काठमाडौं, भक्तपुर र ललितपुर प्रशासन, सुरक्षा निकाय, उद्योग वाणिज्य, ट्राफिकलगायत निकायका अधिकारी सम्मिलित बैठकले समयसीमा तोकेर कर्मचारी, बैंक/बित्तीय संस्थासहित अत्यावश्यक सेवा सञ्चालनमा प्रयोग भएका सवारी समय सीमाभित्र आवतजावत गर्ने गरी अनुमति दिने भएको हो ।

आइतबारदेखि नै यो व्यवस्था लागू गर्न लागिएको महानगरीय ट्राफिक प्रहरी महाशाखा प्रमुख एसएसपी भिमप्रसाद ढकालले जानकारी दिए । एसएसपी ढकालका अनुसार अब निर्माण सामग्री बोकेका ठूला ट्रक/टिपर बेलुका ८ बजे प्रवेश गरेर बिहान ६ बजेभित्र गन्तव्यसम्म पुगिसक्‍नु पर्ने छ ।

त्यस्तै सरकारी कर्मचारी बिहान ९ बजेदेखि १०ः३० सम्म कार्यालय पुगि बेलुका ५ देखि ६ बजेभित्र घर फर्किसक्नुपर्ने छ । यसैगरी बैंक/बित्तीय संस्थाका कर्मचारी आफ्नो सवारीमा बिहान ९ देखि १०ः३० भित्र निस्केर बेलुका ३ः३० देखि ५ बजेभित्र फर्किनु पर्ने छ । यसैगरी दैनिक उपभोग्य बस्तु तथा इन्धन बोक्ने बिहान ४ देखि १० बजेभित्र मात्रै सञ्चालन हुन पाउने छन् ।

औषधि र पानी बोकेका सवारीमा भने समय सीमा तोकिएको छैन । पास भएका सवारी पनि प्रयोजन बिना गुड्न नपाउने व्यवस्था गरिएको एसएसपी ढकालले बताए । चैत ११ गतेदेखि लगाइएको लकडाउनयता अत्यावश्यक सेवा र अनुमतिबाहेकका सवारी साधनबाहेक अन्यलाई सञ्चालन अनुमति दिइएको छैन ।