बीरगन्ज | बीरगन्जस्थित नारायणी अस्पताललाई प्रदेश सरकारले पीसीआर मेसिन उपलब्ध गराउने भनेको पनि दुई चार दिन नै भइसक्यो । मुख्यमन्त्री लालबाबु राउतले दुई चार दिन अघि स्थानीय रेडियोमा अन्र्तवार्ता दिदैं नारायणीमा मंगलबारबाट पीसीआर मेसिन जडान भएर कोरोनाको परिक्षण शुरु हुने बताएका थिए ।

तर यो समाचार तयार पार्दा सम्म अझै नारायणीमा सो मेसिन जडान भएको छैन । प्रदेश सरकारले उपलब्ध गराउने भनिएको सो मेसिन ठूलो रहेको र सो मेसिनले एकैपटक ९० वटा सम्म स्वाब परिक्षण गर्न सक्ने बुझिएको छ ।

तर बीरगन्जलाई ठूलो पीसिआर मेसिन दिदाँ जनकपुरमा भने मुख्यमन्त्री राउतको चर्को आलोचना भएको छ । जिल्लावासी भएर पनि बीरगन्जलाई राजधानी बनाउन कुनै पहल नगरेको भन्ने आरोप खेपेका मुख्यमन्त्री राउत यतिबेला जनकपुरबासीको आँखाको तारो बनेका छन् । पर्साबासीले मुख्यमन्त्री पद पाए पश्चात बीगन्जलाई राजधानी बनाउने सम्बन्धमा राउतले चुप्पी साँधेको आरोप लगाउने गरेका छन् ।

त्यस्तै, अत्याधिक मानिस आवतजावत गर्ने बीरगन्जमा कोरोना महामारी नियन्त्रण र रोकथामका लागि प्रदेश सरकारले केही नगरेको पर्साकै स्थानीय तहका जनप्रतिनिधि तथा सरोकारवालाको पनि आरोप छ । बीरगन्जमा कोरोना विशेष अस्पताल बनाउन भनेर स्थलगत अवलोकनका लागि टोली पठाएर प्रदेश सरकारले झारा टारेको भन्दै चर्को आलोचना पनि भएको थियो ।

यतिबेला चाहिं, जिल्ला मोह देखाउदैं बीरगन्जलाई ठूलो पीसिआर मेसिन दिएको भन्दै जनकपुरबासीले चर्को आलोचना गरेका छन् । सामाजिक सन्जालमा अनेक गालीगलौज गर्दै जनकपुरमा आउन लागेको मेसिन बीरगन्ज पठाउन हस्तक्षेप गरेको आरोप जनकपुरबासीले लगाएका छन् ।

मुख्यमन्त्रीले पहिला नै जनकपुरलाई बेचिदिएको आरोप उनीहरुको छ । बीरगन्जमा सो ठूलो पीसिआर मेसिन जडान भए मुख्यमन्त्रीको पुत्ला दहन गर्ने सम्मको चेतावनी उनीहरुको छ । व्यक्तिगत पहलमा जनकपुर ल्याउन लागिएको मेसिन बीरगन्ज लान मुख्यमन्त्रीले हस्तक्षेप गरेको आरोप मुख्यमन्त्री माथि लागेको छ ।

त्यस्तै, प्रदेशका जे जति योजना बन्छन् ती सबै बीरगन्जका लागि मात्र बन्न गरेको आरोप समेत जनकपुरवासीको छ ।रासस