काठमाडौं । नक्कली भिसा कार्ड प्रयोग गरेर बैंकका एटिएम मेसिनबाट रकम झिक्ने गिरोहका थप एक सदस्यसहित चिनियाँ हृयाकरको समूहलाई सघाएको आरोपमा तीन नेपाली नागरिक पक्राउ परेका छन् । प्रहरीले आइतबार राति त्रिभुवन अन्तर्राष्ट्रिय विमानस्थलबाट चिनियाँ मूलका फ्रान्सेली नागरिकलाई र सोमबार ठमेलबाट तीन नेपालीलाई पक्राउ गरेको हो ।

काठमाडौं प्रहरी परिसर प्रमुख एसएसपी उत्तमराज सुवेदीले ३६ वर्षीय सु लुस लीलाई आइतबार राति त्रिभुवन अन्तर्राष्ट्रिय विमानस्थलस्थित अध्यागमनबाट पक्राउ गरिएको पुष्टि गरेका छन् । उनी एटिएम प्रणाली हृयाक गर्ने गिरोहकै सदस्य रहेको प्रहरीको भनाइ छ । सिसिटिभी फुटेजका आधारमा पहिचान गरी उनलाई पक्राउ गरिएको सुवेदीले बताए ।

मलेसियन एयरलाइन्सबाट मलेसिया जाने तयारीमा रहेका लीबाट प्रहरीले फ्रान्सको नागरिकता फेला पारेको छ । प्रहरीले यसअघि आइतबार बिहान दरबार मार्गमा रहेका विभिन्न बैंकका एटिएम बुथबाट नक्कली भिसा कार्ड प्रयोग गरेर रकम झिक्ने पाँचजना चिनियाँ नागरिकलाई पक्राउ गरेको थियो । उक्त समूहका दुईजना भने फरार रहेको प्रहरीको भनाइ छ ।

केही दिनअघि मात्रै भ्रमण (भिजिट) भिसामा नेपाल आएका ती चिनियाँ नागरिकहरूले विभिन्न बैंकका एटिएम भिसा कार्डको सिस्टम हृयाक गरेर एटिएम बुथमा रहेको सबै रकम निकालेको प्रारम्भिक अनुसन्धानले देखाएको छ । हृयाकरको समूहले सर्भिस प्रोभाइडरमै साइबर आक्रमण गरेर रकम निकालेको प्रारम्भिक अनुसन्धानबाट खुलेको एसएसपी सुवेदीको भनाइ छ ।

प्रहरीले बैंकिङ कसुर मुद्दामा सात दिनको म्याद थप गरेर उनीहरूमाथि अनुसन्धान अघि बढाएको छ । उनीहरूको साथबाट एक करोड ३६ लाख २९ हजार ४५ नेपाली रुपैयाँ, नौ हजार एक सय आठ अमेरिकी डलर, एक हजार ९० युयान, दुई सय ५० युरो, पाँच हजार कम्बोडियन मुद्रा, ८० हङकङ डलरसहित एटिएमबाट रकम झिक्न प्रयोग गरिने एक सय ३२ थान नक्कली भिसा कार्ड, १७ थान सक्कली भिसा कार्ड, एक थान कार्ड प्रिन्टर मेसिन, ६ थान मोबाइल, एक थान ल्यापटप र एक थान डाटा कार्ड बरामद गरेको प्रहरीले जानकारी दिएको छ ।

तीन नेपालीसमेत पक्राउ

नक्कली भिसा कार्ड प्रयोग गरेर बैंकका एटिएम मेसिनबाट रकम झिक्ने गिरोहका चिनियाँ नागरिकलाई सघाएको आरोपमा प्रहरीले तीनजना नेपाली नागरिकलाई समेत पक्राउ गरेको छ । प्रहरीले ठमेलस्थित डेक्सो मनी चेञ्जरका सञ्चालक देवनाथ लामिछाने, नेपाल मनी चेञ्जरका सञ्चालक रोशन प्रधान श्रेष्ठ र म्यानेजर रेवती दवाडीलाई पक्राउ गरेको हो ।

प्रहरीका अनुसार ठमेलमा रहेको डेक्सो मनी चेञ्जर र नेपालय मनी चेञ्जरले अनधिकृत रूपमा चारजना चिनियाँलाई २८ हजार आठ सय ६२ अमेरिकी डलर सटही गरिदिएका थिए । चारजना चिनियाँले आलोपालो गरी ठमेलका दुवै मनी चेञ्जरमा पुगेर पैसा साटिरहेको सिसिटिभी क्यामेरामा भेटिएको छ । प्रहरीले दुवै मनी चेञ्जरका सिसिटिभी फुटेज लिएर अनुसन्धान अगाडि बढाइएको जनाएको छ ।