शनिबार राति ८ः३० बजे सिंगापुरबाट सिल्क एयरको विमान त्रिभुवन अन्तर्राष्ट्रिय विमानस्थलमा अवतरण ग-यो । तर, उक्त विमानमा नेपाल प्रवेश गर्न रोक लगाइएको मुलुक नेदरल्याण्ड्सबाट समेत यात्रु आएको सूचना नेपाल नागरिक उड्ययन प्राधिकरणले पायो।

यसपछि भने तत्कालै प्राधिकरणले उक्त विमान फिर्ता पठाउन निर्देशन दियो । प्राधिकरणले इन्धन भर्न दिने, तर कोही पनि यात्रु ओर्लन नदिई फिर्ता पठाउने निर्णय लिएको थियो । उक्त विमानमा रहेका ८५ यात्रु मध्ये एक जना नेपाली मुलका नेदरल्याण्ड्सका नागरिक थिए ।

तिनै नागरिकका कारण विमानका कसैलाई पनि ओर्लन नदिई सिंगापुर नै फिर्ता पठाउने निर्देशन दिइएको प्राधिकरण स्रोतले जनाएको थियो । तर, राजनीतिक नेतृत्वबाट दबाव बढ्यो । संस्कृति, पर्यटन तथा नागरिक उड्ययन मन्त्री योगेश भट्टराईले नै यसको पहलकदमी लिए ।

विमानस्थल आइपुगेका नेपालीलाई नै फिर्ता पठाउँदा आफ्नै नागरिकको जिम्मा लिन सरकार असफल भएको सन्देश जाने भएपछि मन्त्री भट्टराईले प्रशासनलाई दबाव दिए । मन्त्री भट्टराईकै निर्देशन पछि प्राधिकरणको बैठक लामै चल्यो ।

अन्ततः तीन घण्टा बढी विमानमै बसेका यात्रुकाे स्वास्थ्य जाँच पछि ओरालिएको छ । ती सवै यात्रुलाई क्वारेन्टाइनमा पठाइएको त्रिभुवन अन्तर्राष्ट्रिय विमानस्थल अध्यागमन कार्यालयका प्रशासन प्रमुख सागर आचार्यले बताए ।

शनिबार नै बिना अनुमति विमानस्थलमा अवतरण गरेको थाई र एयर इन्डियाबाट आएका ६४ नेपालीलाई पनि क्वारेन्टाइनमै राखिएको छ । सरकारले शुक्रबार राति १२ बजेपछि खाडी लगायत दक्षिण कोरिया, जापान, इरान र युरोपेली मुलुकबाट नेपाल आउन रोक लगाएको छ ।