वीरगंज संजालकाठमाडौँ | प्रधानमन्त्री केपी शर्मा ओलीले नेपाली सञ्चार माध्यमहरुले अंग्रेजको सिको गर्दै नेपाली भाषा र सभ्यतामाथि हमला गरेको गम्भीर आरोप दोहो¥याउनुभएको छ । नेपाली सञ्चारमाध्यमहरुले समाचारमा गर्ने सम्बोधनप्रति प्रधानमन्त्री ओलीले लगातार गम्भीर असन्तुष्टि व्यक्त गर्दै आउनुभएको छ ।
यसअघि गत असारमा नेपाली मिडियाले तपाईँ भन्न नजानेको र आफ्नो बाउलाई पनि तिमी भन्ने गरेको भन्दै प्रधानमन्त्रीले असन्तुष्टि जनाएपछि यसप्रति थुप्रै टिकाटिप्पणीहरु भएका थिए । त्यसपछि आज गृहमन्त्रालयमा आयोजित एक कार्यक्रममा प्रधानमन्त्रीले भिडियाको भाषाशैलीप्रति आफ्नो असन्तुष्टि फेरि पोख्नुभयो । उहाँले हाम्रा सञ्चारमाध्यमहरु हजुर भन्दाखेरी आफूलाई सारै सानो ठान्ने र अंग्रेजीको कपि गरेर मिस्टर र मिस भनेर बोलाउन पाउँदा राम्रो लाग्ने गरेको बताउनुभयो ।
तर यता भाषाविदहरुले भने प्रधानमन्त्रीको असन्तुष्टि नाजायज भएको प्रतिक्रिया दिएका छन् । सबैलाई समान व्यवहार र समान सम्मान गर्ने परम्परा स्थापित गर्न धेरैजसो मिडियाले अप्रत्यक्ष रुपमा उदृत गर्दा उनी र उनले जस्ता शब्द प्रयोग थालेको भाषाविद राजेन्द्र पराजुलीले बताउनुभयो । उहाँले यसप्रति प्रधानमन्त्रीको असन्तुष्टि जायज नभएको बताउनुभयो । मिडियाले तिमी भन्दैमा अपमान हुने र तपाईँ भन्दैमा सम्मान हुने कुरा बिल्कुलै मान्न नसकिने उहाँको भनाई छ । तर नेपाली भाषाको हिज्जे परम्परा र शुद्धाशुद्धीमा भने सञ्चारमाध्यम जिम्मेबार हुनुपर्ने उहाँले बताउनुभयो ।
प्रधानमन्त्री ओलीले आदरार्थी शब्द र सम्मानयुक्त व्यवहार समाजबाटै हटाउने सुनियोजित प्रयास भएको आरोपसमेत सञ्चारमाध्यमलाई लगाउनुभएको छ । नेपाली भाषामा बच्चालाई तँ भनिने, हुर्किँदै गएपछि तिमी र आफूभन्दा ठूला तथा दौतरीहरुलाई तपाईँ भनिने उल्लेख गर्दै ओलीले तपाई भन्ने आदरार्थी शब्द, व्यवहार समाजबाटै हटाउने सुनियोजित प्रयास भएको आरोप लगाउनुभयो । उहाँले नेपाली सभ्यता र संस्कृतिमाथि सञ्चारमाध्यमहरुबाट निरन्तर हमला भएको समेत आरोप लगाउनुभयो । समाजले मिडियाको सिको गर्न थालेका कारण नेपाली भाषाको सभ्यता नै भत्कन थालेको प्रधानमन्त्रीको चिन्ता छ ।
तर भाषाविद पराजुली यो चिन्ताजनक विषय नरहेको बताउनुहुन्छ । प्रत्यक्ष उदृत गर्दा मिडियाले तिमी कहिल्यै नभनेको उहाँले दाबी गर्नुभयो । हिजो राजामहाराजाहरुलाई मौसुफ र भनिबक्स्यो जस्ता शब्द प्रयोग गरेर अरुलाई उनी र उनले भन्ने गरेको उल्लेख गर्दै उहाँले अबको समाजमा मिडियाले त्यो परम्परा लागु गर्न नहुने जिकिर गर्नुभयो ।
सञ्चार माध्यमलाई समाजको ऐनाका रुपमा पनि चित्रित गरिन्छ । सञ्चार माध्यमले प्रयोग गरेका भाषाशैली समाजले सिको गर्ने गरेको कुरा पनि सत्य हो । तर भाषागत शैलीमा मिडियाले सबैलाई समान व्यवहार गरिनुपर्ने विषय आधुनिक समाजमा महत्वपूर्ण हो ।
नेताले बोलेका समाचारमा बताउनुभयो शब्द प्रयोग गर्ने र कुनै साधारण किसानले बोलेको विषयलाई बताए भनेर सम्बोधन गरिनु बिल्कुल उचित हुँदैन । बरु होलिवाइनको प्रचार गरेर धर्मान्तरणको डरलाग्दो स्वरुप निमार्ण गर्नेहरुबाट नेपाली समाज र सभ्यता खतरामा छ ।
