सिमरा : बहुप्रक्षित मोतिहारी अमलेखगञ्ज पेट्रोलियम पाईपलाईनको उद्घाटन भदौ २४ गते गरिने भएको छ ।
निर्माण सम्पन्न गरी गत साउन तिन गते सफल रुपमा परिक्षण समेत सकिएको परियोजनाको भदौ २४ गते नेपाल र भारत गरि दुबै देशका प्रधानमन्त्रीले संयुक्त रुपमा उद्घाटन गर्नेभएका छन् ।
हाईटेक प्रतिधिमार्फत आ–आफ्नै देशबाट रिमोटमार्फत उद्घाटन गरिने नेपाल आयल निगम श्रोतले जनाएको छ ।
भारतको पटनाबाट मोतिहारी हुँदै नेपालको अमलेखगञ्जसम्म कुल २५९.७ किलोमिटर मध्ये नवनिर्मित मोतिहारीदेखी अमलेखगञ्जसम्मको ६९.७ किलोमिटर पाईपबाट पहिलो चरणमा ३१ लाख लिटर डिजल पठाएर सफल रुपमा परिक्षण गरिएको थियो ।
परिक्षणपश्चात उद्योगमन्त्री मात्रिका यादबले परियोजनाको स्थलगत रुपमा निरिक्षण समेत गरेका थिए । निरिक्षणका क्रममा उनले उचित समय मिलाएर दुबै देशका प्रधानमन्त्रीबाट संयुक्त रुपमा उद्घाटन गरिने बताएका थिए ।
यसअघी भदौ १५ गते (सेप्टेम्बर १ तारिख) र भदौ २४ (सेप्टेम्बर १० तारिख) मध्ये एक समय छनोट गरिने बताईएको थियो तर अब भने भदौ २४ गते उद्घाटन गरिने करिब पक्कापक्की भएको निगम श्रोतले जानकारी दिएको छ ।
