बारा | सिकेन्द्र साह । बारा जिल्लाको सिम्रौनगढ नगरपालिका वडा नम्बर १०, देवापुर टोल टेटामा गएराति भीषण आगलागी हुँदा एक घर पूर्णरूपमा नष्ट भएको छ।

गएराति करिब १:३० बजेको समयमा रामएकवाल राय यादवको घरमा आगलागी भएको हो। पीडित यादवका अनुसार लामखुट्टे धपाउन राखिएको आगोबाट अचानक सल्किएर घरमा आगो फैलिएको थियो। आगलागीका कारण घरमा रहेको सखुवाको काठ, दुई बण्डल तार, साइकल, मटर खेतीका लागि राखिएको पाइपसहित अन्य सामग्री जलेर नष्ट भएका छन्। साथै घरका प्लास्टिकका सामग्री पनि पूर्णरूपमा जलेका छन्।

स्थानीयवासीले आगो नियन्त्रण गर्ने प्रयास गरे पनि आगो झन् फैलिँदै गएपछि घर पूर्ण रूपमा ध्वस्त भएको हो। स्थानीयले नगरपालिकाबाट कुनै पनि प्रकारको दमकल वा उद्धार टोली नआएको भन्दै गुनासो गरेका छन्।

वडा सदस्य सिकिन्द्र यादवले नगरपालिकामा करोडौं रुपैयाँको बजेट भए पनि दमकल बिग्रिएको अवस्थामारहेएको बताए। साथै, उनले नगरपालिकाले आगलागी जस्ता आपतकालीन घटनामा कुनै ध्यान नदिएको आरोप समेत लगाए।

नगर प्रमुख किशोरी साह कलवारले नगरपालिकालाई व्यवसायिक शैलीमा सञ्चालन गरिएको टिप्पणी गर्दै, समयमा दमकल उपलब्ध भएको भए क्षति न्यून गर्न सकिने सम्भावना रहेको बताएका छन्।
पीडित परिवार अहिले विस्थापित अवस्थामा रहेको छ भने स्थानीयले यथाशीघ्र राहत र पुनःस्थापनाको माग गरेका छन्।