वीरगंज । लालबाबू सिंघ । नेसनल एकेडेमी क्याम्पसले आफ्नो २५ औं वार्षिकोत्सवको अवसरमा वीरगन्ज–१६, नगवामा रहेको श्री नेपाल राष्ट्रिय माध्यमिक विद्यालयका कक्षा १० मा अध्ययनरत ३५ जना विद्यार्थी बहिनीहरूलाई नयाँ कपडा वितरण गरेको छ।
भारतिय दूतावास वीरगन्जको पूर्वपट्टी अवस्थित नेसनल एकेडेमी क्याम्पसका प्रमुख केदार प्रसाद साहको नेतृत्वमा तथा वरिष्ठ समाजसेवी अधिवक्ता प्रकाश कुमार उपाध्यायको विशेष सहभागितामा कार्यक्रम सम्पन्न भएको थियो। कार्यक्रममा कलेजका निर्देशक राजकुमार सहनी, ठाकुरराम क्याम्पसका प्राध्यापक इन्दु शंकर मिश्र, वडा नं. १६ की सदस्य लवनी देवी, विद्यालयका शिक्षक अजय साह, वीरगन्ज कपडा बैंकका अध्यक्ष लालबाबु सिंह, समाजसेवी हरेन्द्र यादव, कलेजका लाइब्रेरियन सुरज शर्मा, विद्यालयका शिक्षक गीता ठाकुर र मनोज चौरसिया तथा विद्यार्थी प्रतिनिधिहरूको उपस्थिति रहेको थियो।
कार्यक्रममा वरिष्ठ समाजसेवी उपाध्यायले शिक्षा नै सबैभन्दा ठूलो सम्पत्ति भएको भन्दै विद्यार्थी बहिनीहरूलाई मेहनतका साथ अध्ययन गर्न प्रेरित गरे। उनले विद्यालयको नाम देशमै उच्च स्थानमा पुर्याउन विद्यार्थीहरूलाई लागिपर्न आह्वान गर्दै भविष्यमा थप सहयोग गर्ने प्रतिबद्धता पनि व्यक्त गरे।
कलेज प्रमुख साहले आफ्नो विद्यार्थी जीवनका अनुभव सुनाउँदै, छोरी–बेटीहरूको शिक्षामा जोड दिए। उनले शिक्षा र समर्पणले मात्र समाज र देश समृद्ध हुने बताए। विद्यालयका शिक्षक अजय साहले कार्यक्रमप्रति आभार प्रकट गर्दै कलेज परिवारलाई वार्षिकोत्सवको शुभकामना व्यक्त गरे।
वीरगन्ज कपडा बैंकका अध्यक्ष लालबाबु सिंहले संस्थाले बिगत ६ वर्षदेखि असहाय तथा विपन्न समुदायलाई कपडा तथा अन्य सामग्री सहयोग गर्दै आएको उल्लेख गर्दै, कलेज परिवारको सहयोगप्रति आभार व्यक्त गरे।
कार्यक्रममा ठाकुरराम क्याम्पसका प्राध्यापक मिश्रले शिक्षा नै जीवनको मूल आधार भएको बताउँदै अनुशासन र परिश्रमलाई जीवनमा आत्मसात गर्न आग्रह गरे।
उक्त कार्यक्रमले विद्यार्थीहरूलाई आत्मबल वृद्धि गर्ने र समाजप्रति सकारात्मक सोच विकास गर्न प्रेरणा दिएको विद्यालयले जनाएको छ। कार्यक्रमको अन्त्यमा विद्यालय परिवारले नेसनल एकेडेमी क्याम्पसलाई २५ औं वार्षिकोत्सवको शुभकामना सहित धन्यवाद व्यक्त गरेको थियो।
