पर्सा | वीरगंज महानगरपालिकाका विभिन्न क्षेत्रहरूमा पछिल्ला केही दिनदेखि खानेपानीको चरम अभाव भोग्नु परिरहेको छ। संघीय सरकार र स्थानीय तहको सहकार्यमा यो समस्याको दीर्घकालीन समाधानका लागि डिप बोरिंग जडान, पाइपलाइन चुहावट नियन्त्रण तथा धारा जडान सहज बनाउन आवश्यक स्रोत र जनशक्ति परिचालन गरिएको नेपाल खानेपानी संस्थानले जानकारी दिएको छ।
संस्थानका अनुसार वीरगंज शाखाले दैनिक ८० लाख लिटर पानी उत्पादन तथा वितरण गर्दै आइरहेको भए पनि हाल कैयौं ठाउँमा भल्व (भल्ब) अनधिकृत रूपमा खोलिएको, पाइप फुटाइएको र मोटर जडान गरी जबर्जस्ती पानी तानिएको पाइएपछि समस्या झनै जटिल बनेको छ।
विशेषगरी सपर्स अस्पताल र शुभलाभ पेट्रोल पम्पको पछाडिको गल्ली क्षेत्रमा राति भल्व बन्द गरी पाइपमा मोटर जोडिएको भेटिएको संस्थानले जनाएको छ। यसले नगरवासीहरूलाई सहज आपूर्ति हुन नसकेको मात्र होइन, संस्थालाई बदनाम गर्ने प्रयास समेत भइरहेको देखिएको छ।
नेपाल खानेपानी संस्थान वीरगंज शाखाले यस्तो कार्यलाई ‘कृत्रिम अभाव सिर्जना गर्ने कुचेष्टा’ भन्दै गम्भीर आपत्ति जनाएको छ। साथै, यस प्रकारका अवैध क्रियाकलापबारे सूचना दिन नगरवासीहरूलाई आग्रह गरिएको छ।
संस्थानले नगरवासीहरूसँग सहकार्य र समर्थन बिना वीरगंजलाई खानेपानी संकटबाट मुक्त बनाउन असम्भव रहेको स्पष्ट पारेको छ। संस्थाले सबैलाई संयमित, जिम्मेवार र जागरूक भई गलत कार्यमा संलग्न व्यक्तिहरूको पहिचान गराई तत्काल जानकारी गराउन अपिल गरेको छ।
संस्थाका अनुसार, नगरवासीको सक्रिय सहभागिताले मात्र सबैको साझा उद्देश्य — घरघरमा पर्याप्त र सुरक्षित खानेपानी आपूर्ति — सफलतापूर्वक पूरा गर्न सकिन्छ।
