वीरगञ्ज । लालबाबु सिंह। नेसनल इन्फोटेक कलेज वीरगञ्जले गर्मीयाममा बढ्दो रगत अभावलाई ध्यानमा राख्दै बुधबार आकस्मिक रक्तदान कार्यक्रम सम्पन्न गरेको छ । वीरगञ्ज–१५ ब्रह्मचोकस्थित कलेज परिसरमा आयोजित कार्यक्रममा २४ महिला सहित १६९ जनाले रगतदान गरेका छन् ।
कलेजका सञ्चालक मनिष सिंह र काजल सिंहले रक्तदान गर्दै कार्यक्रमको उद्घाटन गरेका थिए । उनीहरुले रक्तदाताहरुलाई ब्लड कलेक्सन ब्याग प्रदान गरी हौसला समेत बढाएका थिए । कार्यक्रममा सयोनी कुमारी, रबिना खातुन, मनिका यादव, स्नेहा साह, सम्झना यादव, रानु पाल, कञ्चन कुमारी, सुजाता यादव, चित्रलेखा कुमारी, सुधिर पटेल, जितेन्द्र कुमार साह, जितेश पटेल, रोहित मण्डल, चन्दन महतो कहार, शशी बरनवाल, आयुष शर्मा, राहुल कुमार गुप्ता लगायतले रक्तदान गरेका थिए ।
कार्यक्रममा वीरगञ्ज कपडा बैंकका अध्यक्ष लालबाबु सिंह, नेपाल रेडक्रस सोसाइटी रानिघाट उपशाखा सभापति सतिश सिंह राजपुत, सामाजिक अभियन्ता दिवेश मानवसेवा, ओमकुमार झा, राजन श्रीवास्तव, सञ्चारकर्मी अर्जुन चौधरी, अभिलाश गुप्ता, कलेजका शिक्षक, विद्यार्थी, कर्मचारी तथा स्थानीयको बाक्लो उपस्थिति रहेको थियो ।
कलेजका सञ्चालक मनिष सिंहले वीरगञ्जमा गर्मीयाममा रगतको चरम अभाव हुने भएकाले आकस्मिक रक्तदान कार्यक्रम आयोजना गरिएको बताए । “रक्तदान जात, धर्म, धनी–गरिब केही नहेरी मानवताको लागि गर्ने कार्य हो,” उनले भने, “यसले जीवन बचाउँछ, त्यसैले यसइ जिवनदान भनिन्छ ।” उनले सबैलाई नियमित रुपमा रक्तदान गर्न आग्रह गर्दै सहभागी तथा रक्तदाताप्रति आभार व्यक्त गरे ।
कलेजका एशिया निर्देशक सुधिर पटेलले प्रत्येक तीन महिनामा हाम्रो शरीरमा रगत नयाँ बन्ने भएकाले नियमित रक्तदानले मानवता बलियो बनाउने बताए । रक्तसञ्चार केन्द्र वीरगञ्जका प्राविधिक धिरेन्द्र झाको नेतृत्वमा स्वयंसेवक टोलीले रक्तदातालाई सहयोग गरेका थिए ।
