भारतीय गाईलाई नेपाल ल्याएर बंगलादेशतर्फ तस्करी गर्ने गरेको एक अनुसन्धानबाट खुल्न आएको छ । बंंगलादेशमा गाईको मासुको उच्च माग हुने गर्छ । साेही फाइदा उठाउन तस्करहरुले भारतबाट बुढा गाईखरिद गरी चोर बाटो प्रयोग गरेर नेपालतर्फ पैठारी गर्ने र नेपालबाट बंगलादेशसम्म पुर्याउने गरेकाे पाइएकाे छ ।

त्यसरी भारतबाट ल्याइएका गाई नेपाली नै रहेकाे र निरोगी रहेकाे जाली कागजात/प्रमाण तयार पारी नेपालको पुर्वी नाका भएर बंगलादेशसम्म पुर्याउने गरेको प्रमाण फेला परेको हाे ।

कसरी हुन्छ तस्करी ?

वीरगञ्जका नामुद गाई तस्कर प्रदेशी यादवले आफ्नी श्रीमती अन्जु कुमारी अहिरको नाममा वीरगञ्जको अशोक बाटिकामा ‘प्रदेशी गाई पालन फार्म’ खोलेका छन् । फार्म भने देखाउनका लागि मात्रै हो । भारतबाट तस्करी गरी ल्याइएका गाई राख्नको लागि मात्रै याे फार्म बनाइएकाे देखियाे । फार्ममा न त दूध उत्पादन हुन्छ, न त बिक्री-वितरण नै । तस्करीका गाई राख्ने गोदामका रूपमा याे फार्म रहेकाे छ ।

भारतीय सीमावर्ती शहर रक्सौल पन्टोकामा गाई जम्मा गरिन्छ । जम्मा गरिएको गाई बोलेरो पिकअपमा लोड गरी वीरगञ्जको सिरिसिया नाका हुँदै वीरगञ्जको अशोक बाटिकास्थित तस्कर प्रदेशी यादवको फार्ममा राखिन्छ ।

त्यसरी गाई तस्करीमा सीमावर्ती क्षेत्रमा खटेका नेपाल प्रहरी र सशस्त्र प्रहरीको समेतको मिलोमतो रहेको कारण सिमानामा गाई रोक्ने काम गरिँदैन प्रहरीकै अगाडिबाट गाई लोड भएको पिकअप निर्बाध नेपाल प्रवेश गर्छ ।

जनप्रतिनिधिकाे पनि मिलेमताे

यसरी नाकाबाट निर्बाध नेपालमा गाई भित्र्यापछि तस्करहरुले वडासचिव र जनप्रतिनिधिसँग पनि मिलेमताे गर्छन् । उनीहरूसँग मिलेर नेपालकै गाई भएको सिफारिस लिन्छन्, सो वापत सिफारिस प्रतिगाई दुई हजार रूपैयाँ बुझाएर खुसी पार्छन् ।

त्यसपछि पशु चिकित्सकले गाईको निरोगिता प्रमाण पत्र दिने गरेका छन् । नेपालमा भारतीय पशुपंक्षी आयात गर्न प्रतिबन्धित गरिएकाेले त्यसरी कर्मचारी र जनप्रतिनिधिलाई प्रलोभनमा पारेर जाली प्रमाण बनाउने गरेको नाम नखुलाउने र्शतमा एकजनाले जानकारले बताएका छन् ।

के गर्दैछन् सराेकारवाला ?

भारतबाट गाई तस्करी भएर नेपाल आउने र सो वापत रकमी चलखेल हुने गरेको सम्बन्धमा जिल्ला पशु सेवा कार्यलय पर्साका डा दिनेश कुमार तिवारीसँग हाम्रो टेलिफोनमा लामो सम्वाद भएको थियो ।

पशु चिकित्सक डा तिवारीले गाई-भैँसी नेपालको हो कि भारतको हो, कुनै सरोकार नहुने र स्वास्थ्य परिक्षणको प्रमाण पत्र दिने गरेको पनि स्वीकार गरेका छन् ।

नेपालको गाई भएको प्रमाण नभए बाटोमा प्रहरीले गाई नियन्त्रणमा लिएर भन्सार बुझाएर लिलाम गर्न सक्छ । त्यसैले गाई तस्करहरुले घुस खुवाएर जाली प्रमाण बनाउने गरेको खुलासा भएकाे हाे ।

नेपालकै विभिन्न जिल्लाबाट समेत गाईहरु बंगलादेश तस्करी हुँदै आएको बेलाबखत समाचार आउने गरेको थियो । फेसबुकमा तस्करहरुले भारतबाट गाई नेपाल ल्याएर नेपाली गाई भएको जाली प्रमाण बनाई नेपाली बाटो प्रयोग गरी बंगलादेश तस्करी हुने गरेको कुरा बाहिरिएपछि हामीले यस सम्बन्धनमा सूक्ष्म अनुसन्धान र स्थलगत रिपाेर्टिङ गरेका हाैँ ।

यद्यपि यसरी हुने गाईको तस्करीसम्बन्धी प्रहरी प्रशासन र स्थानीय निकायले कुनै पनि किसिमको प्रतिकृया दिएका छैनन् ।