दाङ | निर्माण व्यवसायीको लापर्बाहका कारण दाङको घोराहीमा करिब तीन वर्षदेखि निर्माणाधीन पुल अझै बन्न सकेको छैन । घोराही उपमहानगरपालिका–१७ गैरा गाउँ र घनिबगिया जोड्ने कटुवा खोलामा डेढ वर्षभित्र पुल निर्माण सक्ने गरी २०७८ असार १४ गतेदेखि निर्माण कार्य सुरु भएको थियो । जम्मा ४ करोड १७ लाख रुपैयाँमा पुल निर्माणको जिम्मा महादेव खिम्ती÷अञ्जना÷जलजला जेभी काठमाडौँले लिएको थियो ।

सम्झौता अनुसार पुल निर्माणको काम सकिनुपर्ने भए पनि अहिलेसम्म करिब ७० प्रतिशत मात्रै काम भएको सडक पूर्वाधार विकास कार्यालय दाङका प्रमुख इन्जिनियर मनीष अर्यालले बताउनुभयो । पुरानो निर्माण व्यवसायीले पुल निर्माण समयमा सम्पन्न गर्न नसकेपछि नयाँ व्यवसायीलाई जिम्मा दिएर काम गराउँदा ढिलाइ भएको प्रमुख अर्यालले बताउनुभयो ।

हाल पुल निर्माणको काम तीव्र रूपमा भइरहेकाले आगामी असोजसम्ममा काम सम्पन्न हुने कार्यालयले जनाएको छ । समयमा पुल नबन्दा स्थानीयले सास्ती खेप्नु परेको छ भने वर्षा याममा विद्यार्थीलाई खोला तरेर विद्यालय जान समस्या हुने गरेको छ ।