वीरगन्ज । देशभर व्यापक वर्षा र बाढीको सम्भावना रहेको भन्दै मौसम पूर्वानुमान महाशाखाले सतर्क रहन आग्रह गरेको छ । असार १५ गते आइतबार लुम्बिनी, मधेस, कर्णाली र सुदूरपश्चिम प्रदेशका केही जिल्लामा भारीदेखि धेरै भारी वर्षा हुन सक्ने जनाइएको छ । बाँके, बर्दिया, दाङ, सुर्खेत, दैलेख, सल्यान, बैतडी, डडेलधुरा, डोटी, अछाम, कैलाली, कञ्चनपुरसहित मधेस प्रदेशका तराई र भित्री मधेस क्षेत्रमा पनि अविरल वर्षा हुने सम्भावना रहेको महाशाखाले जनाएको छ । मधेस प्रदेशमा विशेष गरी पर्सा, बारा, रौतहट, सर्लाही, महोत्तरी र धनुषा आसपासका जिल्लामा भारी वर्षा हुनसक्ने भन्दै सतर्क रहन भनिएको छ ।
गत २४ घण्टामा कास्की, सिन्धुपाल्चोक, प्युठान, कञ्चनपुर र मधेसका केही भागमा एक सय मिलिमिटरभन्दा बढी अविरल वर्षा भएको मापन गरिएको छ । लगातारको पानीका कारण नदी तथा नहरमा पानीको बहाव उच्च हुने र बाढी तथा डुबानको जोखिम मधेसका जिल्लामा समेत बढ्न सक्ने चेतावनी दिइएको छ । महाशाखाले नदी किनार, खोला आसपासका बस्ती र पहाडी तथा तराई क्षेत्रका बासिन्दालाई पूर्वतयारी गर्न र सुरक्षित स्थानमा रहन अनुरोध गरेको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले सबै स्थानीय तह र सुरक्षा निकायलाई तत्काल पूर्वतयारीका लागि निर्देशन दिएको छ । आवश्यक बाहेकका यात्रा स्थगित गर्न, मौसम अपडेट हेर्न र आकस्मिक अवस्थामा प्रहरी तथा विपद् व्यवस्थापन निकायसँग सम्पर्क राख्न समेत आग्रह गरिएको छ ।
