वीरगंज | इन्डोनेसियाको राष्ट्रिय ध्वजावाहक एयरलाइन गरुडा इन्डोनेसियाको एक अन्तर्राष्ट्रिय उडानमा यात्रुको आइफोन हराएपछि चालक दलका सबै सदस्यहरू निलम्बनमा परेका छन्। गत जुन ६ मा जाकार्ताबाट अष्ट्रेलियाको मेलबर्न जाँदै गरेको गारुडा इन्डोनेसियाको फ्लाइट GA716 मा यात्रा गरिरहेका माइकल ट्जेन्डाराको आइफोन हराएको थियो। मेलबर्न पुगिसकेपछि उनले आफ्नो फोन हराएको थाहा पाएर एप्पलको ‘फाइन्ड माई आइफोन’ सुविधा प्रयोग गरेर लोकेसन ट्र्याक गरे।
ट्र्याक गर्दा फोन पहिलोपटक मेलबर्नस्थित मर्कर होटल नजिक देखियो, जुन होटलमा उक्त फ्लाइटको चालक दल बस्ने गरेको खुलेको छ। केही समयपछि सो फोन यार्रा नदी नजिक पुगेको देखिएको थियो र अन्ततः नदीबाट फेला परेको थियो। यस घटनापछि यात्रुले आफूले फ्लाइटमा फोन हराएको दाबी गर्दै गारुडा इन्डोनेसियासँग उजुरी गरे।
उनको उजुरीपछि एयरलाइनले तत्काल उक्त उडानमा खटिएका सबै क्याबिन क्रु सदस्यहरू र पाइलटसहितका चालक दललाई अस्थायी रूपमा निलम्बन गरेको जनाएको छ। एयरलाइन्सका वाणिज्य निर्देशक एडे आर. सुजार्दीका अनुसार, घटनाबारे गम्भीर अनुसन्धान सुरु गरिएको छ र यात्रुलाई पनि आवश्यक सबै सहयोग प्रदान गरिएको छ।
घटनाले गारुडा इन्डोनेसियाको यात्रु सुरक्षामा गम्भीर प्रश्न उठाएको छ। एयरलाइन्सले भने सुरक्षामा कुनै सम्झौता नगरिने भन्दै सत्य तथ्य पत्ता लगाउन आन्तरिक अनुसन्धान सुरु गरिएको स्पष्ट पारेको छ। यो घटनाले टेक्नोलोजी, विशेषगरी ‘फाइन्ड माई आइफोन’ जस्तो ट्र्याकिङ सुविधाले हराएको वस्तु खोज्न कति प्रभावकारी हुन सक्छ भन्ने देखाएको छ, तर दोषी को हो भन्ने पुष्टि हुन अझै अनुसन्धान बाँकी रहेको जनाइएको छ।
